Këshilli i Ministrave ka miratuar në mbledhjen e sotme një sërë vendimesh dhe projektligjesh që prekin disa fusha, përfshirë mbrojtjen e mjedisit, rindërtimin, sigurinë publike dhe administrimin fiskal.
Një prej vendimeve përcakton veprimtaritë që konsiderohen me rrezik për mjedisin, ndërsa një tjetër vendos kriteret që do të përdoren për vlerësimin e kërcënimeve të mundshme dhe dëmeve që mund t’i shkaktohen mjedisit.
Ndryshime janë miratuar edhe në kuadrin e zhvillimit të ekonomisë malore në Bashkinë Shijak, si dhe në përdorimin e fondit të rindërtimit.
Ky fond do të përdoret për ndërhyrje në forcimin e banesave në Tiranë, Durrës, Shijak, Lezhë dhe Krujë.
Në fushën e sigurisë publike, qeveria ka përcaktuar kriteret për dhënien e Medaljes së Shërbimit të Rendit Publik, duke përcaktuar kushtet dhe kriteret për vlerësimin e kontributit në këtë sektor.
Në të njëjtën mbledhje janë miratuar edhe disa projektligje që lidhen me marrëveshjet ndërkombëtare të Shqipërisë për shmangien e tatimit të dyfishtë dhe parandalimin e evazionit fiskal me Lituaninë dhe Gjermaninë.
Një tjetër projektligj sjell ndryshime në ligjin për administrimin e objekteve të konfiskuara si ndërtime pa leje, duke ndërhyrë në mënyrën e administrimit të këtyre pasurive.
Vendimet dhe projektligjet e miratuara prekin kështu disa prej fushave të administrimit publik, nga mbrojtja e mjedisit dhe rindërtimi, te siguria dhe politikat fiskale./Versus.al
