Vdekja e ish-komandantit të Ushtrisë së Republikës Srpska, Ratko Mlladiç, ka rikthyer në vëmendje debatin për përballjen e Serbisë dhe serbëve me krimet e luftës në Bosnje dhe Hercegovinë.
Pas lajmit për vdekjen e tij, në disa qytete të Bosnjës dhe Hercegovinës dhe Serbisë janë zhvilluar tubime në nderim të Mlladiçit. Në Pale dhe Zvornik, qindra persona kanë dalë në rrugë, kanë ndezur qirinj dhe kanë brohoritur emrin e ish-komandantit serb.
Tubime të ngjashme janë raportuar edhe në zona të tjera të Republikës Srpska. Pjesëmarrja e të rinjve që nuk kishin lindur në kohën e luftës ka shkaktuar reagime dhe shqetësime të forta, veçanërisht për mënyrën se si trashëgohet dhe përcillet narrativa mbi konfliktin e viteve ’90.
Gazeta gjermane Frankfurter Allgemeine Zeitung i ka lidhur këto zhvillime me atë që e konsideron si mungesë të një përballjeje të plotë të Serbisë me të kaluarën. Sipas medias gjermane, deklaratat e disa liderëve serbë kanë kontribuar gjithashtu në krijimin e një narrative që e paraqet Mlladiçin si viktimë të Tribunalit të Hagës.
Ndërkohë, një tjetër tubim është paralajmëruar më 2 shtator në Srebrenicë, në kuadër të asaj që organizatorët e kanë cilësuar si “lamtumirë” për Mlladiçin.
Tubimi është konsideruar provokues, pasi Srebrenica lidhet drejtpërdrejt me një prej krimeve më të rënda të luftës në Bosnje. Në korrik të vitit 1995, forcat e Ushtrisë së Republikës Srpska, nën komandën e Mlladiçit, kryen masakrën e Srebrenicës, e cila është cilësuar si gjenocid nga gjykatat ndërkombëtare.
Ratko Mlladiç, i njohur gjerësisht si “Kasapi i Ballkanit”, vdiq në burgun e Hagës në moshën 84-vjeçare. Ai po vuante dënimin me burgim të përjetshëm, pasi ishte shpallur fajtor për gjenocid, krime kundër njerëzimit dhe krime lufte.
