Një nismë e re për uljen e çmimeve ka nisur të zbatohet në Greqi, me synimin për të lehtësuar kostot për konsumatorët dhe për të frenuar shtrenjtimin e produkteve bazë.
Në kuadër të Nismës Kombëtare për Uljen e Çmimeve, deri tani janë përfshirë mbi 1,660 produkte, ndërsa ulja mesatare është rreth 7%. Për disa artikuj, zbritja arrin deri në 30%.
Produktet e përfshira do të dallohen në raftet e supermarketeve përmes një etikete të posaçme me mbishkrimin “Ulja e Çmimeve – Nisma Kombëtare në praktikë”. Konsumatorët do të mund të shohin çmimin e ri, ndërsa informacioni i detajuar për produktet dhe përqindjen e uljes do të jetë i disponueshëm edhe online përmes platformës “PosoKanei”.
Nga të dhënat e fundit rezulton se rreth 900 produkte të markave të njohura janë përfshirë në skemë, me një ulje mesatare prej 7%. Në raste të veçanta, ulja shkon deri në 30%.
Nisma përfshin gjithashtu më shumë se 450 artikuj shkollorë, me ulje mesatare rreth 10%, rreth 250 produkte të markave private me ulje 7% dhe mbi 60 produkte mishi, me ulje mesatare prej 7.2%.
Në këtë program marrin pjesë më shumë se 90 kompani furnizuese, 12 rrjete supermarketesh dhe 3 rrjete dyqanesh për lodra dhe artikuj shkollorë.
Çmimi përfundimtar mund të jetë edhe më i ulët se ulja e përcaktuar nga furnizuesi, pasi supermarketet kanë mundësi të aplikojnë zbritje shtesë. Për këtë arsye, i njëjti produkt mund të shitet me çmime të ndryshme në rrjete të ndryshme supermarketesh.
Nisma synon t’u japë konsumatorëve më shumë mundësi për të krahasuar çmimet dhe për të përfituar nga uljet, duke vendosur në fokus produktet ushqimore dhe artikujt bazë të konsumit.
