Kokaina është shndërruar për herë të parë në produktin më të madh të eksportit të Kolumbisë, duke tejkaluar edhe naftën. Të dhënat janë publikuar në një raport të Universitetit EAFIT, me bazë në Medellín.
Sipas studimit, në vitin 2024 eksportet e paligjshme të kokainës nga Kolumbia kapën vlerën e rreth 16.5 miliardë dollarëve, ndërsa eksportet e naftës gjeneruan rreth 15 miliardë dollarë.
Rritja e trafikut të kokainës e forcon më tej pozicionin e Kolumbisë si prodhuesi më i madh i kësaj droge në botë. Sipas raportit, vendi siguron rreth 70% të furnizimit global me kokainë.
Shifrat tregojnë edhe peshën gjithnjë e më të madhe të ekonomisë së paligjshme. Kokaina vlerësohet të ketë përbërë rreth 4.4% të Prodhimit të Brendshëm Bruto të Kolumbisë në vitin 2024, ndërsa një dekadë më parë kjo shifër ishte vetëm 0.8%.
Edhe prodhimi është rritur në mënyrë të ndjeshme. Nga më pak se 300 tonë në vitin 2013, prodhimi vjetor i kokainës në Kolumbi është rritur në afro 3,000 tonë në vitin 2024.
Pas naftës, sektori i tretë më i madh i eksporteve është qymyri, me rreth 7.1 miliardë dollarë. Eksportet e ligjshme të arit kapën 4.1 miliardë dollarë, ndërsa nxjerrja e paligjshme e arit vlerësohet në rreth 3.6 miliardë dollarë.
Raporti i EAFIT evidenton gjithashtu diferencat e mëdha të vlerës përgjatë zinxhirit të trafikut. Çmimi i produktit rritet ndjeshëm pas përpunimit dhe më tej kur droga arrin në tregjet ndërkombëtare.
Në tregjet evropiane, sipas studimit, çmimi me shumicë mund të kalojë 78 mijë dollarë për kilogram, duke gjeneruar marzhe të konsiderueshme fitimi për organizatat kriminale që kontrollojnë hallkat e ndryshme të trafikut.
Studiuesit paralajmërojnë se zgjerimi i rrjeteve ndërkombëtare të shpërndarjes dhe rritja e prodhimit kanë bërë që ekonomia e kokainës të ketë një peshë gjithnjë e më të madhe në ekonominë kolumbiane.
