Presidenti amerikan Donald Trump ka habitur sërish me një postim në rrjetet sociale, duke lënë të kuptohet se shteti i New Mexico-s mund të quhet “New America”.
Trump publikoi të dielën në platformën Truth Social një imazh të hartës së shtetit, ku emri “Mexico” ishte fshirë me të kuqe dhe ishte zëvendësuar me fjalën “America”.
Postimi u rishpërnda edhe nga Shtëpia e Bardhë në platformën X, por nuk shoqërohej me ndonjë shpjegim apo njoftim zyrtar për një nismë për ndryshimin e emrit të shtetit.
Një ndryshim i tillë, megjithatë, nuk mund të bëhet me urdhër të presidentit. Ndërsa Trump ka kompetenca për të ndryshuar emërtimet federale të disa veçorive gjeografike, ai nuk ka autoritet kushtetues për të riemërtuar një shtet amerikan. Për një ndryshim të emrit të New Mexico-s do të nevojitej një proces ligjor brenda vetë shtetit.
Postimi i Trump vjen vetëm pak ditë pasi ai nënshkroi një urdhër ekzekutiv për ndryshimin e emërtimit të Liqenit Ontario në “Lake America” në sistemin federal të emrave gjeografikë.
Ndërkohë, që prej janarit 2025, Trump ka ndërmarrë një tjetër nismë të ngjashme. Në ditën e parë të rikthimit në Shtëpinë e Bardhë, ai urdhëroi ndryshimin e emërtimit federal të Gjirit të Meksikës në “Gjiri i Amerikës”.
Deri më tani, Shtëpia e Bardhë nuk ka dhënë asnjë sqarim nëse postimi për New Mexico-n ishte një propozim real apo thjesht një deklaratë simbolike e presidentit./Versus.al
