Kryeministri izraelit Benjamin Netanyahu ka bërë një deklaratë të fortë, duke pretenduar se Irani ka tentuar të vrasë një prej djemve të tij.
Gjatë një interviste telefonike për televizionin izraelit Channel 14, Netanyahu tha se autoritetet iraniane kishin vënë në shënjestër një nga djemtë e tij, por nuk dha detaje mbi kohën kur dyshohet se ka ndodhur komploti apo mënyrën se si është planifikuar.
“Irani shënjestroi një nga djemtë e mi. Irani u përpoq të vriste një nga djemtë e mi”, deklaroi Netanyahu.
Kryeministri izraelit nuk bëri të ditur se cili prej djemve ishte objektivi. Djali i tij i madh, Yair Netanyahu, jeton në Miami.
Netanyahu i bëri deklaratat teksa po fliste për sigurinë e kandidatëve për kryeministër dhe familjeve të tyre. Ai tha se mbrojtja e shtuar nuk duhet konsideruar si privilegj, duke theksuar se kërcënimet ndaj familjes së tij e bëjnë atë të domosdoshme.
Ai tha gjithashtu se i ka kërkuar kreut të Shin Bet, David Zini, që të sigurohet mbrojtje e përshtatshme për çdo kandidat për postin e kryeministrit.
Pretendimi vjen në një periudhë tensionesh të larta mes Izraelit dhe Iranit. Megjithatë, Netanyahu nuk dha prova apo informacione të tjera për të sqaruar se sa pranë realizimit ishte përpjekja e pretenduar për vrasjen e djalit të tij.
Autoritetet izraelite nuk kanë bërë deri tani publike detaje të tjera mbi rastin./Versus.al
