Një ngjarje e rëndë ka tronditur Sevastopolin në Krime, ku një ish-oficer i marinës ukrainase, i cili kishte kaluar në anën ruse, u vra nga shpërthimi i një bombe të vendosur në një kosh plehrash.
Në qendër të hetimit është Margarita Reut, 32 vjeçe, shtetase ruse, e cila është arrestuar nga autoritetet ruse dhe akuzohet se ka kryer atentatin me urdhër të shërbimeve ukrainase të inteligjencës. Sipas raportimeve, viktima ishte Robert Shageev, 49 vjeç, ish-komandant i nëndetëses ukrainase “Zaporizhzhia”, i cili u bashkua me palën ruse pas aneksimit të Krimesë në vitin 2014.
Shpërthimi ndodhi në Sevastopol dhe ishte aq i fuqishëm sa banorët fillimisht dyshuan se bëhej fjalë për një sulm me dron. Autoritetet ruse pretendojnë se Reut e kishte vendosur bombën në koshin e plehrave dhe më pas e kishte aktivizuar atë në momentin kur Shageev ndodhej pranë.
Sipas mediave ruse të cituara nga Proto Thema, 32-vjeçarja nuk ka shfaqur pendesë gjatë marrjes në pyetje dhe dyshohet se pas atentatit kishte planifikuar të largohej jashtë Rusisë. Raportohet se ajo kishte blerë edhe një biletë nga Soçi, por plani i arratisjes nuk u realizua.
Reut, e lindur në Jaroslavl, raportohet se kishte punuar më parë si biologe dhe kishte drejtuar një agjenci udhëtimesh. Më vonë, emri dhe fotografitë e saj u shfaqën në faqe interneti të shërbimeve eskortë me pagesë.
Mediat raportojnë gjithashtu se ajo kishte shprehur në të kaluarën qëndrime kundër Moskës dhe luftës në Ukrainë, madje kishte deklaruar se ndihej e turpëruar që ishte ruse. Në vitin 2025, ajo ishte ndaluar pasi kishte bërë komente publike kundër ushtrisë ruse.
Autoritetet ruse po hetojnë mënyrën se si 32-vjeçarja dyshohet se është rekrutuar dhe nëse ka pasur persona të tjerë të përfshirë në përgatitjen dhe ekzekutimin e atentatit. Nëse shpallet fajtore, ajo mund të përballet me deri në 30 vite burgim./Përshtati në shqip Versus.al
