Një mësues në Nepal ka arritur të shpëtojë jetën e 1,643 nxënësve, pasi kuptoi në kohë se përmbytjet po i afroheshin shkollës së tij.
Ngjarja ndodhi në shkollën e mesme Tribhuvan Trishuli, në luginën e Trishulit, në veri-qendër të Nepalit. Drejtori i shkollës, Rajendra Dawadi, 47 vjeç, mori një telefonatë që e paralajmëroi se një fshat disa kilometra më lart ishte përfshirë nga ujërat.
Në atë moment, rreth 900 nxënës ndodheshin tashmë në shkollë, ndërsa 700 të tjerë po udhëtonin drejt saj në këmbë ose me autobus. Pak më vonë, një prind e paralajmëroi drejtorin se niveli i ujit po rritej me shpejtësi dhe po i afrohej godinës së shkollës.
Dawadi nisi menjëherë të telefononte drejtuesit e autobusëve dhe u kërkoi të ktheheshin pas. Ai arriti të kontaktonte me të gjithë, përveç njërit. Kur pa autobusin e fundit duke iu afruar shkollës, i kërkoi edhe atij të kthehej.
“Ai arriti në anën tjetër pikërisht në momentin kur ura u shemb”, tregoi mësuesi për mediat.
Më pas, Dawadi u përqendrua te nxënësit që ndodheshin brenda shkollës. Kur panë rrezikun, fëmijët nisën të panikoseshin. Një vajzë pësoi një sulm paniku dhe u transportua me motor, ndërsa pjesa tjetër e nxënësve u udhëzua të ngjitej me shpejtësi drejt një zone më të lartë.
Fëmijët u strehuan nën një pemë bodhi, ndërsa vendimi i shpejtë i drejtorit bëri të mundur shpëtimin e 1,643 nxënësve dhe të gjithë stafit, me përjashtim të një mësuesi.
Mësuesi Santos Pariyar, 32 vjeç, i cili sapo ishte emëruar në shkollë, kishte shkuar herët atë mëngjes për të zhvilluar orë shtesë mësimi, por u mor nga ujërat.
Përmbytjet dhe rrëshqitjet masive të dheut kanë shkaktuar një situatë katastrofike në Nepal. Sipas të dhënave të cituara në raportim, 734 persona kanë humbur jetën dhe 2,498 të tjerë rezultojnë të zhdukur, ndërsa më shumë se 3,700 persona janë shpëtuar deri tani.
Ndërkohë, ekipet e shpëtimit po vijojnë kërkimet edhe në tunelet e hidrocentralit Trishuli 3A, ku dyshohet se mund të jenë bllokuar më shumë se 100 punëtorë.
Autoritetet kanë paralajmëruar gjithashtu për rrezikun e përmbytjeve të reja, ndërsa ekipet e emergjencave vijojnë operacionet e shpëtimit në zonat më të prekura./Përshtati në shqip Versus.al
