TikTok dhe kompania mëmë ByteDance kanë rënë dakord të paguajnë 400 milionë dollarë për të zgjidhur një proces të ngritur nga autoritetet amerikane lidhur me mbrojtjen e të dhënave të fëmijëve.
Çështja nisi në vitin 2024, kur Departamenti i Drejtësisë i SHBA-së, në emër të Komisionit Federal të Tregtisë (FTC), akuzoi TikTok se kishte lejuar fëmijë nën 13 vjeç të krijonin llogari dhe kishte mbledhur e ruajtur të dhënat e tyre personale pa njoftimin dhe pëlqimin e prindërve.
Autoritetet pretenduan gjithashtu se kompania nuk kishte fshirë gjithmonë llogaritë dhe informacionet e fëmijëve edhe kur prindërit e kërkonin një gjë të tillë.
Sipas marrëveshjes, TikTok do të paguajë 300 milionë dollarë menjëherë, ndërsa 100 milionë dollarët e tjerë do të paguhen në kuadër të anulimit të një marrëveshjeje të mëparshme të vitit 2019, që lidhej me paraardhësin e TikTok, Musical.ly.
Marrëveshja nuk kërkon që TikTok apo ByteDance të pranojnë fajësinë. Ndërkohë, autoritetet amerikane kanë vlerësuar ndryshimet që platforma ka ndërmarrë që nga nisja e çështjes, përfshirë masa më të forta për verifikimin e moshës, mbrojtjen e përdoruesve të mitur dhe mbikëqyrjen prindërore.
Ky është një nga penalitetet më të mëdha të vendosura në një çështje amerikane që lidhet me privatësinë e fëmijëve./Versus.al
