Ndryshime të rëndësishme pritet të ketë në sezonin e ri televiziv në Top Channel, ku një prej emisioneve më jetëgjata të ekranit shqiptar pritet të nisë një kapitull të ri.
Pas më shumë se 20 vitesh në drejtimin e “Fiks Fare”, gazetari Filip Çakuli pritet të largohet nga emisioni investigativ. Sipas burimeve pranë televizionit, Çakuli dhe zëvendësuesja e tij, Denisa Haxhiaj, janë njoftuar për largimin nga formati.
Në krye të ekipit të “Fiks Fare” mësohet se pritet të jetë gazetarja Antela Lika, e cila është pjesë e skuadrës investigative dhe autore e disa prej investigimeve dhe denoncimeve të rëndësishme të emisionit ndër vite.
“Fiks Fare”, i cili ka rreth 25 vite në ekran, është një prej formateve më të njohura të gazetarisë investigative në Shqipëri. Largimi i Çakulit shënon një ndryshim të rëndësishëm në drejtimin e emisionit, ndërsa pritet që fokusi te investigimet dhe problematikat sociale të vijojë edhe në sezonin e ri.
Ndryshime edhe në “Portokalli”
Risi priten edhe në spektaklin e humorit “Portokalli”. Pas largimit të Salsano Rrapit nga drejtimi i programit, aktori dhe moderatori Agron Llakaj pritet të rikthehet në krye të spektaklit.
Sipas burimeve pranë televizionit, Llakaj pritet të marrë drejtimin e “Portokalli”, ndërsa Ilir Muhametaj do të vijojë të jetë regjisor i spektaklit.
Ndërkohë, largimi i Salsano Rrapit nga “Portokalli” nuk nënkupton largimin e tij nga Top Channel. Sipas të njëjtave burime, me aktorin dhe moderatorin janë zhvilluar negociata për përfshirjen e tij në një tjetër projekt televiziv.
Ndryshime të tjera priten edhe në “Përputhen”, duke e bërë sezonin e ri televiziv në Top Channel një periudhë me lëvizje të rëndësishme në disa prej formateve kryesore./Versus.al
