Një piton rrjetëzor 4.5 metra i gjatë në kopshtin zoologjik Chester Zoo është bërë gjarpri i parë i njohur që i është nënshtruar elektrokimioterapisë, pas rikthimit të një tumori kanceroz në nofull.
Pitonja 50 kilogramëshe, e quajtur Jodie Foster, ishte diagnostikuar me fibrosarkomë malinje, pasi kujdestarët vunë re se kishte filluar të ushqehej më pak dhe të qëndronte më gjatë pa lëvizur.
Veterinerët fillimisht ia hoqën tumorin, por ai u rishfaq më vonë dhe nisi të prekte një pjesë të kockës së nofullës.
Për trajtimin e saj, veterinerët e Chester Zoo bashkëpunuan me specialistë të Universitetit të Liverpoolit për të përshtatur elektrokimioterapinë.
Terapia kombinon ilaçin kundër kancerit bleomicinë me impulse elektrike të kontrolluara, të cilat bëjnë që qelizat kanceroze të bëhen përkohësisht më të përshkueshme. Në këtë mënyrë, ilaçi mund të depërtojë më efektivisht në qeliza.
Veterineri Ian Ashpole tha se ekipi kishte frikë se tumori i rikthyer do ta pengonte Jodie-n të ushqehej.
“Me sa dimë, kjo është hera e parë që kjo terapi është përdorur ndonjëherë te një gjarpër”, u shpreh ai.
Ndërhyrja zgjati rreth 90 minuta. Veterinerët hoqën tumorin dhe një pjesë të kockës së sëmurë të nofullës, përpara se të aplikonin elektrokimioterapinë. Për shkak të përmasave të mëdha të pitones, u desh të bashkoheshin dy tavolina operacioni.
Pavarësisht se i është hequr një pjesë e nofullës, Jodie Foster ka ruajtur oreksin dhe aftësinë për të gjuajtur.
Sipas Chester Zoo, kontrolli i fundit i kryer këtë javë nuk ka treguar shenja të rikthimit të kancerit, duke shënuar një rezultat pozitiv për trajtimin e pazakontë./Versus.al
