Një robot humanoid kinez i quajtur “Lightning” ka tërhequr vëmendjen në botën e teknologjisë pasi ka përshkuar distancën 100 metra për vetëm 9.32 sekonda.
Koha është regjistruar gjatë një testi të zhvilluar përpara edicionit të dytë të Lojërave Botërore të Robotëve Humanoid, që zhvillohen në Pekin.
Sipas prodhuesit kinez të pajisjeve inteligjente Honor, “Lightning” arriti një shpejtësi maksimale prej 14.5 metrash në sekondë, duke demonstruar kapacitete të larta për vrapim me shpejtësi.
Roboti pritet të marrë pjesë në garat e 100, 400 dhe 1.500 metrave gjatë aktivitetit, i cili zhvillohet nga 22 deri më 26 gusht.
Lojërat përfshijnë edhe disiplina të tjera sportive, si kërcimi së gjati, ngritja e peshave dhe pingpongu. Në aktivitet marrin pjesë ekipe nga vende të ndryshme, duke prezantuar zhvillimet e fundit në robotikë dhe inteligjencën artificiale.
Koha e “Lightning” është më e shpejtë se rekordi botëror i Usain Bolt prej 9.58 sekondash, të vendosur në Kampionatin Botëror të vitit 2009 në Berlin.
Megjithatë, performanca e robotit nuk mund të konsiderohet rekord botëror në atletikë. Rekordi i Bolt mbetet rekordi zyrtar për atletët njerëzorë, pasi robotët nuk përfshihen në rregullat e garave të World Athletics.
