Pas platformës së prezantuar së fundmi nga kryeministri Edi Rama, “Pasqyrë Albania”, edhe Partia Demokratike pritet të lançojë një nismë të re për komunikimin dhe organizimin politik.
Kreu i PD-së, Sali Berisha, do të prezantojë më 27 gusht, gjatë mbledhjes së Këshillit Kombëtar, platformën “Agora PD”, e cila është përgatitur gjatë muajve të verës.
Sipas dokumentit të platformës, “Agora PD” synon të shërbejë si një lloj sistemi operacional i Partisë Demokratike, duke bashkuar në një hapësirë të vetme komunikimin, organizimin, koordinimin dhe përfshirjen e qytetarëve.
Platforma parashikon një komunikim më të unifikuar të strukturave të PD-së, me mesazhe të përbashkëta, materiale zyrtare dhe rekomandime për mënyrën e komunikimit, nga drejtimi qendror deri te degët lokale.
Një tjetër element i saj do të jetë vlerësimi i angazhimit të anëtarëve dhe funksionarëve të partisë. Sipas dokumentit, kontributet organizative dhe publike do të regjistrohen në mënyrë të strukturuar, me synimin që puna dhe angazhimi i secilit të evidentohen.
“Agora PD” do të përfshijë gjithashtu monitorimin e rrjeteve sociale dhe mediave, me fokus te shqetësimet dhe problematikat që qytetarët shprehin online. Këto të dhëna synohet të përdoren për orientimin e axhendës dhe komunikimit politik të opozitës.
Nisma vjen në një moment kur PD-ja synon të forcojë organizimin e saj në terren dhe të rrisë komunikimin me bazën dhe qytetarët, ndërsa zgjedhjet e ardhshme vendore afrohen.
Krijimi i “Agora PD” vjen pak kohë pas lançimit nga Rama të “Pasqyrë Albania”, platformë përmes së cilës qeveria synon të monitorojë problematikat e qytetarëve dhe mënyrën se si institucionet u përgjigjen atyre.
Dy nismat politike shfaqen në një klimë të tensionuar politike, ku prej muajsh vijon protesta në Tiranë, me kërkesa që lidhen edhe me ndryshimin e klasës politike dhe mënyrën e qeverisjes./Versus.al
