Gjykata Kushtetuese është përfshirë në një ‘anormalitet’ pas dorëheqjes së anëtares Elsa Toska më 19 shtator të këtij viti dhe nisjes së procedurave për përzgjedhjen e pasuesit të saj. Sipas përllogaritjes së Kuvendit, gjyqtari i përzgjedhur për mandatin e lënë vakant do të qëndrojë në detyrë deri në 2028-ën, çka e para është në shkelje të Kushtetutës, së dyti mund ta çojë dhe në kolaps këtë gjykatë duke rrezikuar përtëritjen e saj.
Kështu Kuvendi, llogariti se mandati i lënë bosh nga Toska përfundon në 14 nëntor 2028 dhe jo në 2025-ën duke vënë në rrezik skemën e ripërtëritjes së Gjykatës Kushtetuese. Lidhur me këtë çështje, gazetarja Anila Hoxha ka ngritur një tjetër problem që nuk është kapur nga publiku. Në faqen e parlamentit i cili zgjedh 3 prej anëtarëve të Gjykatës Kushtetuese, janë zhdukur gjurmët e procedurave të ndjekura për Elsa Toskën. Në historikun e faqes zyrtare "www.parlament.al" nuk aksesohet historiku.
Sipas formulës së funksionimit në gjykatën Kushtetuese duhet të ketë rotacion për 3 anëtarë në 2025-ën, Sonila Bejtjan, Holta Zaçajn dhe Elsa Toskën nëse edhe ajo do ishte ende në detyrë. Por me dorëheqjen e saj, Kuvendi e ka përllogaritur mandatin e lënë vakant që të zgjasë edhe 3 vite më shumë, pra deri në 2028-ën.
Gazetarja Anila Hoxha ngre pyetjen kush do të prekë Gjykatën Kushtetuese për shkak se procedurat për përzgjedhjen e Toskës janë zhdukur nga faqja e Kuvendit ku edhe bëhet transparenca.
Postimi i plotë i gazetares:
Kur Kushtetuta shkelet !
Nuk është vetëm dorëheqja e befte e gjyqtares Kushtetuese zonjës Elsa Toska, që bën të paqarta të vërtetat që po ndodhin në këtë gjykatë. Por edhe llogaritë mbi MANDATIN e Toskës dhe që duhet ti vijojë anëtari zëvendësues . Në rrezikun se KUSHTETUTA po shkelet hapur nga Kuvendi ( si organ emërtese) mbasi llogariti se mandati Toska përfundon në 14 nëntor 2028 dhe jo në 2025 .
Por në ndihmë na vjen vetë KUSHTETUTA .
Duke mos harruar cfarë thotë Komisioni I Venecias që llogarit se në përtëritjen e Gjykatës Kushtetuese sipas kësaj formule, të parit I përfundonte mandati në 2016 gjyqtarit Kushtetues Vladimir Kristos I cili e dorëzoi detyrën disa muaj më vonë. Ky mandat që vjen me organ emërtese Kuvendin merret në 2019 nga Elsa Toska për të cilën nëse kërkon në faqen ëëë. parlament. Al nuk aksesohet historiku. Pra janë zhdukur gjurmët e procedurave qe nga raporti mbi vakancën deri tek vendimi për shpalljen aktuale.
Per te mos harruar qe Kushtetuta urdhëron formulën e përtëritjes së Gjykatës kushtetuese cdo tre vjet të cilën nuk mund ta prekë askush.
As Kuvendi në këtë rast, sic edhe po ndodh;
Cfarë thotë Kushtetuta?
Neni 179 : “Me qëllim përtëritjen e rregullt të përbërjes së Gjykatës Kushtetuese, gjyqtari që do të zëvendësojë gjyqtarin, të cilit i mbaron mandati në vitin 2017, do të qëndrojë në detyrë deri në vitin 2025 dhe gjyqtari i ri, që do të zëvendësojë gjyqtarin, të cilit i mbaron mandati në vitin 2020, do të qëndrojë në detyrë deri në vitin 2028. Gjyqtarët e tjerë të Gjykatës Kushtetuese emërohen për të gjithë kohëzgjatjen e mandatit, sipas ligjit. ”
Qëllimi I Kushtetutës është te ketë rotacion për tre anëtare në 2025. Thënë ndryshe në 2025 nën këtë rotacion për gjashtë muajt e parë duhet ti nënshtrohen edhe dy gjyqtaret e tjera kushtetuese Holta Zacaj dhe Sonila Bejtja dhe nese do ishte Toska edhe ajo. Ketij rotacioni llogjikisht duhet ti nenshtrohet pasuesi qe e zevendeson
Në të kundërtën me llogaritë që mandatet nuk përfundojnë në 2025 , por në 2028, në këtë vit Gjykata Kushtetuese hyn në kolaps sërisht. Mbasi sipas llogarive të keqllogaritura në Kuvendit, në 2028 duhet mbeten në detyrë vetëm tre Gjyqtarë Kushtetues
Dhe pyetja që mbetet është kujt I intereson ta preke Gjykatën Kushtetuese?
Përtej kësaj pyetjeje, KED këtë të premte do të hedhë shortin për të vendosur kush do të relatojë 10 kandidaturat , prej nga ku do të ketë vetëm një fitues. E sigurtë është që ndërkombëtarët do ta mbikëqyrin procesin të vënë nën diskutim.
E para , ashtu sic edhe për KED gjasat janë që sic edhe gazetarëve, edhe nëntë anëtarët nuk kanë patur asnjë mundësi të gjejnë praktikën e Kuvendit për Elsa Toskën ne faqen zyrtare Parlament. Al
Është e zhdukur.
Presidenca nga ana tjeter duhet te mbante te publikuara dekretet vetem per anetaret qe ka derguar ne Gjykate Kushtetuese. Te pakten ky eshte pretendimi se perse nuk gjenden gjurme per ish gjyqtaren kushtetuese Elsa Toska
E dyta , KED do të diskutojë për cështjen e mandatit përtëritës mbi parime të kushtetutës dhe të raportit të Komisionit të Venecias.
Por në këtë rast as KED nuk e urdhëron dot kuvendin, thjesht mund ti tërheqë veshin me sygjerime mbi zgjatjen e një mandati që më shumë se dhurimi I 3 viteve me teper dhe si padashje, është një lojë e madhe që duhet hetuar.
Kujtojmë që aktualisht në Gjykatën Kushtetuese është në pritje caktimi i seancës për një vendimmarrje lidhur me përgjimet e “Sky Ecc” për të cilat biznesmeni Pëllumb Gjoka i arrestuar për dosjen “Metamorfoza” ka kërkuar pavlefshmëri duke i konsideruar përgjimet si prova “jo-ligjore”. Gjithashtu për shqyrtim në gjykatën Kushtetuese është edhe çështja e dhënies me koncesion të Parkut të Butrintit, ndërsa ka edhe një urdhër ndaj Kuvendit për t’i dërguar për shqyrtim çështjen e papajtueshmërisë së mandatit të deputetes Olta Xhaçka, gjë e cila është kundërshtuar nga socialistët të cilët fillimisht e rrëzuan me shumicë votash më pas abstenuan për ta dërguar për opinon në Komisionin e Venecias. Versus.al
