Sot shënohet 81-vjetori i Çlirimit të Shqipërisë nga pushtuesit nazifashistë. Përkujtohet sot përfundimi i betejës së shqiptarëve për çlirimin nga pushtimi nazifashist, si një përkujtesë e detyrës qytetare të çdo shtetasi shqiptar për të mbrojtur atdheun kur ai është në rrezik.
Në këtë ditë janë parashikuar të zhvillohen aktivitete të ndryshme përkujtimore në nderim të dëshmorëve që ranë për atdheun.
Krerët e lartë të shtetit pritet të mbajnë homazhet në Varrezat e Dëshmorëve dhe të vendosin kurora lulesh në monumentin “Nëna Shqipëri”, statuja ku prej vitit 1971 personalitetet e vendit urojnë “Lavdi e përjetshme dëshmorëve të Atdheut”.
Prej 7 prillit të vitit 1939 e deri në nëntorin e 1944-ës, Shqipëria kishte qenë e pushtuar nga Italia dhe pas kapitullimit të saj, në vjeshtën e vitit 1943, vendi u sulmua nga forcat gjermane. Ushtria Nacionalçlirimtare e Shqipërisë, më 29 nëntor të vitit 1944, njoftoi edhe çlirimin e qytetit të fundit, Shkodrës.
Lufta e viteve ’40 e renditi Shqipërinë në krahun e koalicionit të madh antifashist botëror dhe e veçoi atë nga shtetet e tjera të Ballkanit, të cilat nuk arritën të çliroheshin me forcat e veta. Versus.al
