Rrëshqitjet e vazhdueshme tokësore në zonën "Arrat e Gurrës" pranë Librazhdit kanë bllokuar plotësisht aksin rrugor Librazhd-Pogradec, duke izoluar juglindjen e Shqipërisë për ditë me radhë dhe duke krijuar kaos në qarkullim me devijime të gjata përmes Maliq-Lozhan-Moglicë-Gramsh.
Përpjekjet e ARRSH-së, Policisë dhe Emergjencave Civile për një rrugë alternative provizore dështojnë çdo ditë për shkak të shembjeve të reja në faqen e kodrës dhe trupin e rrugës, me rrëshqitje deri në 7 metra thellësi që rrezikojnë edhe linjat elektrike dhe hekurudhore, duke detyruar evakuime familjesh.
Prokuroria e Elbasanit ka nisur menjëherë hetime për shpërdorim detyre dhe dëmtime mjedisore, duke u fokusuar te punimet e Korridorit VIII në këtë segment, ku dyshimet bien mbi bllokimin e përrenjve lumorë dhe nxjerrjen masive të inerteve nga Shkumbini nga ana e kompanisë kontraktore ANK SHPK.
ANK SHPK, e drejtuar nga Agim Kola vëllai i ish-deputetit Ndue Kola nuk është e panjohur për probleme të tilla:
Në shkurt 2024, rruga Korçë-Ersekë (lot i 2, 17 km) u shemb menjëherë pas ndërtimit, pas pagesës së 50 milionë eurove bazë plus 4 milionë shtesë për "punë të paparashikuara", me kosto të tejfryra deri në 5 milionë euro për kilometër në segmente të shkurtra prej 4 km.
Kjo firmë, bashkë me A&E Engineering të Entela Çanos, u kallëzua në SPAK nga avokati Esmerald Xhafa për korrupsion në tendera, falsifikim projektesh dhe abuzime, por hetimet kanë ngadalësuar, duke lejuar ANK-në të fitojë tendera të rinj si zgjerimi Elbasan-Qafë Thanë me 29 milionë euro.
Hetimet tregojnë një model: Tendera kontestuar për klientelizëm dhe vlerë të lartë, zvarritje pune dhe shembje të shpejta, me taksapaguesit të ngarkuar për riparime të përsëritura.
Në Librazhd, mungesa e studimeve gjeologjike të plota dhe ndërhyrjet në shtratin lumor kanë destabilizuar të gjithë shpatin, duke e kthyer një projekt prioritar si Korridorin VIII në fatkeqësi publike.
ARRSH premton rivlerësim urgjent, por pyetjet mbeten: Si një kompani me histori dështimesh vazhdon të marrë kontrata miliona euro dhe kush mbikëqyr cilësinë?/Versus.al
