Një incident i pazakontë ka ndodhur në një nga plazhet e frekuentuara të Shqipërisë, ku pushimi nën diell është kthyer në përplasje fizike. Një debat i ndezur për një lojë me top mes pushuesve dhe një punonjësi të shërbimit të çadrave ka degjeneruar në dhunë.
Sipas pamjeve të publikuara nga gazetari Mentor Kikia, një grup pushuesish janë përfshirë në konflikt me një punonjës, duke e përplasur atë në tokë. Ngjarja ka ndodhur në prani të dhjetëra pushuesve të tjerë, të cilët kanë mbetur të habitur nga sjellja agresive që pasoi një mosmarrëveshje banale.
Në video dallohet qartë një atmosferë e tensionuar, ndërsa plazhi për një moment kthehet në një skenë përleshjeje në vend të relaksit veror. Nuk dihet ende nëse është njoftuar policia apo nëse personat e përfshirë janë ndaluar.
Rasti ka ngjallur reagime të shumta në rrjete sociale, me qytetarë që dënojnë sjelljet e dhunshme në hapësirat publike dhe kërkojnë masa më të rrepta për sigurinë në plazhe gjatë sezonit turistik. /Versus.al
