Një operacion policor i koduar “Shije e hidhur” ka zbuluar një skemë të shpërndarjes së lëndëve narkotike në qytetin e Durrës, ku droga përgatitej në formë karamelesh dhe dyshohet se shpërndahej pranë shkollave të mesme.
Operacioni u zhvillua nga strukturat e Drejtorisë Vendore të Policisë Durrës në bashkëpunim me njësitë hetimore, duke çuar në zbulimin e një baze për përpunimin e drogave sintetike dhe goditjen e një rrjeti që synonte kryesisht adoleshentët.
Në pranga kanë rënë dy vëllezër, shtetasit L. L., 20 vjeç dhe R. L., 25 vjeç, ndërsa është shpallur në kërkim bashkëpunëtori i tyre, Xh. L., 20 vjeç.
Sipas hetimeve, të rinjtë kishin krijuar një sistem të mirëorganizuar për prodhimin e lëndëve narkotike sintetike në formë xhelatine, të ngjashme me karamele, me qëllim që t’i bënin më tërheqëse për moshat e reja. Secili prej tyre kishte rol të përcaktuar në zinxhirin e shpërndarjes, nga prodhimi deri te transporti.
Gjatë kontrolleve, policia sekuestroi 50 paketime droge në formë karameleje me peshë rreth 650 gramë, pranë zonës së shkollave. Ndërkohë, në banesën e tyre në Tiranë u gjet një sasi e konsiderueshme materialesh për prodhimin e drogës, përfshirë kanabis, substanca sintetike, peshore elektronike dhe kallëpe plastike për formësim.
Autoritetet bëjnë të ditur se operacioni është pjesë e masave për rritjen e sigurisë në shkolla dhe parandalimin e përhapjes së narkotikëve tek të rinjtë. Hetimet vijojnë për identifikimin e personave të tjerë të përfshirë në këtë aktivitet kriminal.
Njoftimi i policisë:
Durrës/Finalizohet Operacioni policor i koduar “Shije e hidhur”.
Zbulohet baza që prodhonte drogë sintetike për adoleshentët
Gjatë operacionit u godit rrjeti që prodhonte dhe shpërndante drogë në formë karamelesh pranë shkollave.
Vihen në pranga dy vëllezër dhe shpallet në kërkim bashkëpunëtori i tyre.
Sekuestrohen dhjetëra paketime me lëndë narkotike të përpunuar në formë karameleje, xhelatine në formë karameleje, përbërës të ndryshëm që shërbejnë për prodhimin e karameleve me lëndë narkotike sintetike dhe lëndë narkotike kanabis.
Në përmbushje të një prej prioriteteve e kryesore , atë të sigurisë së jetës dhe shëndetit të nxënësve në shkolla, duke parandaluar dhe goditur fenomenet negative me fokus lëndët narkotike, bazuar dhe në informacionet siguruara në rrugë operative, nga ana e Seksionit për Hetimin e Narkotikëve, në bashkëpunim me Seksionin për Mbështetjen Operacionale të Hetimit pranë Drejtorisë Vendore të Policisë Durrës, u bë i mundur finalizimi i operacionit policor të koduar “Shije e hidhur”.
Gjatë operacionit është zbuluar një bazë e përpunimit të drogave sintetike si dhe është goditur grupi që prodhonte dhe shpërndante drogën sintetike pranë shkollave të mesme.
Në vijim të operacionit u arrestuan në flagrancë dy vëllezër , konkretisht shtetasit L. L., 20 vjeç dhe R. L, 25 vjeç, të dy lindur në Kavajë dhe banues në Tiranë.
Si dhe u bë shpallja në kërkim e shtetasit Xh. L, 20 vjeç, banues në Tiranë, ku vijon puna intensive për kapjen e tij.
Këta shtetas, në bashkëpunim me njëri-tjetrin, kishin përgatitur kushtet për përpunimin e lëndëve narkotike, duke arritur të prodhonin lëndë narkotike sintetike në formë xhelatine (“karamele”).
Secili nga shtetasit kujdesej për krijimin e kushteve për ushtrimin e aktivitetit të jashtëligjshëm, konkretisht për prodhimin, transportimin dhe shitjen e lëndës narkotike, kryesisht te moshat adoleshente.
Gjatë kontrollit të ushtruar ndaj shtetasit L. L., pranë bllokut të shkollave, shërbimet e Policisë i gjetën dhe sekuestruan në cilësinë e provës materiale 50 paketime me lëndë narkotike të përpunuar në formë karameleje, me peshë 650 gramë.
Nga kontrolli i ushtruar në banesën e këtyre shtetasve në Tiranë, u gjetën dhe u sekuestruan në cilësinë e provës materiale, xhelatine në formë karameleje; lëndë narkotike kanabis; 550 gramë material sintetik i gatshëm për prodhimin e karameleve sintetike me lëndë narkotike; një peshore elektronike; kallëpe plastike si ato që përdoren për dhënien e formës së karameleve; si dhe përbërës të ndryshëm që shërbejnë për prodhimin e karameleve me lëndë narkotike sintetike.
Nga ana e Seksionit për Hetimin e Narkotikëve në bashkëpunim me Prokurorinë vijon puna për identifikimin dhe dokumentimin e shtetasve të tjerë të përfshirë në këtë veprimtari kriminale.
Materialet hetimore procedurale do të referohen pranë Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprën penale “Prodhimi dhe shitja e narkotikëve”, në bashkëpunim./Versus.al
