Më 13 maj 2025 është hera e fundit kur është parë i gjallë Miklovan Dakaj, një shtetas shqiptar 20-vjeçar që jetonte në Costa del Sol. Zhdukja e tij u denoncua nga ish-partnerja në polici, duke vënë në lëvizje menjëherë autoritetet.
Sipas raportimeve të Policía Nacional, që në fillim u dyshua se bëhej fjalë për një rrëmbim të lidhur me krimin e organizuar që vepron në jug të Spanjës.
Muaj më vonë, në tetor të vitit të kaluar, një shtetas polak zbuloi rastësisht një çantë të madhe në rezervuarin Casasola, në zonën e Almogía. Brenda saj u gjetën mbetjet mortore të Dakajt, të lidhura.
Njësia e Policisë Gjyqësore në Malaga ka arritur të zbardhë krimin, ndërsa hetimet vijojnë për motivin.
Burime policore bëjnë me dije se deri tani nuk është provuar lidhje direkte me trafikun e drogës, megjithatë pista e një “larjeje hesapesh” mbetet e fortë.
Sipas raportit fillestar, Miklovan Dakaj kishte qenë në një restorant në Puerto Banus më 12 maj kur i tha ish-partneres së tij se po shkonte të takonte "miq" në një vend tjetër në Malaga. Ai besonte se po i ofrohej punë si truproje, por rreth 90 minuta më vonë, ai u zhduk.
BMË X6 e tij u gjet më vonë ende e parkuar në restorant, duke ngritur shqetësime të menjëhershme. Hetimi u mor përsipër nga oficerët e krimit të organizuar, të cilët filluan të analizonin orët e tij të fundit.
Pamjet e sigurisë zbuluan më pas një Peugeot 208 me qira që priste në restorant para se të mbërrinte Miklovan Dakaj. Automjeti ishte marrë me qira në Barcelonë vetëm disa ditë më parë nën emrin e një gruaje 59-vjeçare.
Pamjet e mëtejshme treguan të riun shqiptar duke hyrë në makinë së bashku me tre të dyshuar, të gjithë tani në qendër të çështjes. Midis tyre ishin dy shtetas shqiptarë, të identifikuar si Ilir J. dhe Indrit G., së bashku me gruan e lidhur me qiranë.
Si arritën hetuesit te autorët e dyshuar
Ndërsa kamerat humbën gjurmët e automjetit në një moment, hetuesit arritën ta vendosnin atë pranë rezervuarit duke përdorur të dhënat e sinjalit celular. Sipas një vendimi gjykate, telemetria e makinës e lidhi atë me antenat telefonike që mbulonin zonën e saktë ku u gjet më vonë trupi.
Monitorimi i telefonit dhe mbikëqyrja fizike ishin gjithashtu çelësi në ndërtimin e çështjes.
Një gjyqtar në Malaga ka urdhëruar që Ilir J. të mbahet në paraburgim pa lirim me kusht, ndërsa Indrit G. u lirua me një garanci prej 25,000 eurosh.
Ndërsa policia nuk e ka konfirmuar zyrtarisht motivin, burimet sugjerojnë se vrasja lidhet me një larje hesapesh brenda qarqeve të krimit të organizuar.
Ajo që filloi si një rast personi i zhdukur tani ka ekspozuar mekanizmat e një ekzekutimi të dyshuar nga bandat - nga joshja e viktimës me pretekste të rreme, deri te transportimi i tij nëpër provincë dhe së fundmi hedhja e trupit të tij në një vend të largët.
Ngjarja vjen në një kohë kur dhuna e grupeve kriminale në Málaga dhe veçanërisht në Marbella është në rritje. Në vitet e fundit janë shtuar incidentet me armë zjarri, nga klubet e natës te palestrat, madje edhe në autostrada.
Autoritetet spanjolle theksojnë se organizatat kriminale janë bërë më të forta dhe më të dhunshme, duke kaluar nga trafiku i hashashit drejt kokainës, që sjell fitime më të mëdha. Kjo ka rritur edhe rivalitetin mes grupeve, duke çuar shpesh në përplasje dhe ekzekutime./Versus.al
