Një 31-vjeçar u vra me thikë pasditen e së premtes në zonën e ish-parkut në Tiranë, ngjarje që dyshohet të ketë ndodhur pas ngacmimeve ndaj gruas së autorit, Gazment Buçpapaj, nga Egli Pashollari.
Sipas burimeve të policisë, bashkëshortja e Buçpapaj, e cila punon si shitëse në një market afër vendit të ngjarjes, i kishte treguar burrit për ngacmimet e viktimës.
Rreth orës 15:40, Gazment Buçpapaj së bashku me gruan dhe një person tjetër u përfshinë në konflikt me 31-vjeçarin, duke e goditur atë me thikë për vdekje.
Pas ngjarjes, autorët u larguan me makinën e Buçpapaj, e braktisën atë dhe më pas morën një taksi drejt banesës së tyre në zonën e Sharrës. Pas mbërritjes, Buçpapaj është arratisur dhe aktualisht ndodhet në kërkim nga policia.
Gruaja e autorit është marrë në pyetje dhe ka deklaruar se viktima e ngacmonte shpesh. Po ashtu, prindërit e Buçpapaj kanë konfirmuar të njëjtin version. Ajo nuk është arrestuar, ndërsa hetimet për zbardhjen e plotë të rrethanave të ngjarjes vijojnë.
/Versus.al
