Aktivistët e arrestuar nga Izraeli, pas ndalimit të anijeve me ndihma të nisura drejt Gazës, janë liruar.
Lajmi vjen një ditë pasi bëri jehonë video e qarkulluar në rrjet, ku ata u shfaqën me sy të lidhur dhe të gjunjëzuar, çka solli reagime të ashpra në qarqet ndërkombëtare.
Izraeli ka deportuar të gjithë aktivistët e huaj që ndodheshin në bordin e flotiljes humanitare për Gazën, mes të cilëve dhe shqiptarin Baki Goxhaj.
Sipas autoriteteve izraelite, rreth 430 anëtarë të Flotiljes Globale “Sumud”, e përbërë nga afro 50 anije, u ndaluan pranë Qipros të hënën dhe më pas u transferuan me forcë në Izrael. Aktivistët u mbajtën në burgun Ketchiyot, në jug të vendit, ndërsa mbrojtja ligjore për ta u sigurua nga grupi izraelit i të drejtave të njeriut Adalah.Pjesëe flotijës ishte ehe aktivisti shqiptar Baki Goxhaj.
Zëdhënësi i Ministrisë së Jashtme izraelite, Oren Marmorstein, deklaroi se “ata të gjithë janë deportuar”, pa dhënë detaje nëse aktivistët dolën apo jo para gjykatës.
Ndërkohë, përfaqësuesi i Adalah, Moatasem Zeidan, tha për Agence France-Presse se në fund aktivistët nuk u paraqitën para një gjyqtari, megjithëse fillimisht ishte planifikuar një procedurë gjyqësore për deportimin e tyre.
Sipas të njëjtit burim, aktivistët u transportuan drejt aeroportit Ramon, pranë Eilatit në jug të Izraelit, prej nga u nisën drejt vendeve të tyre. Aktivistët egjiptianë dhe jordanezë u kthyen përmes pikave kufitare të Tabës dhe Akabës.
