Policia ka dhënë detaje për incidentit e regjistruar mesditën e sotme në aksin rrugor Lezhë-Shkodër.
Sipas njoftimit zyrtar të Policisë së Shtetit, rreth orës 12:00, Njësia Operacionale për Sigurinë Rrugore dhe Autostradat i ka bërë shenjë ndalimi një automjeti që po kryente manovra të rrezikshme për përdoruesit e tjerë të rrugës.
Drejtuesi i mjetit, Justin Dushku, 26 vjeç, banues në Lezhë, rezultoi se kishte lejen e drejtimit të pezulluar për një shkelje të mëparshme.
Në momentin kur policia i kërkoi të shoqërohej për veprime të mëtejshme, i riu refuzoi të ndalonte dhe tentoi të largohej me shpejtësi, duke vënë në rrezik jetën e punonjësit të policisë.
Në kushtet e një rreziku të menjëhershëm dhe real, efektivi përdori armën e shërbimit duke qëlluar në gomën e automjetit, çka bëri të mundur neutralizimin dhe ndalimin e tij.
Gjatë kontrollit, në automjet u gjet edhe një armë e ftohtë pa leje. Për fat të mirë, ngjarja u menaxhua pa pasoja për jetën apo shëndetin e qytetarëve dhe punonjësve të policisë.
Dushku dhe pasagjeri i tij E.S., 20 vjeç, janë shoqëruar në Komisariatin e Policisë Lezhë.
Ndaj 26 vjeçarit po kryhen hetime për veprat penale “Drejtimi i mjeteve në mënyrë të parregullt”, “Kundërshtimi i punonjësit të policisë së rendit publik” dhe “Mbajtja pa leje e armëve të ftohta”.
Ndërkohë, një grup i posaçëm hetimor i Policisë së Shtetit dhe Agjencisë së Mbikëqyrjes Policore, nën drejtimin e Prokurorisë së Lezhës, ka nisur hetimet për të sqaruar plotësisht rrethanat e ngjarjes dhe për të verifikuar ligjshmërinë e përdorimit të armës nga ana e efektivit të policisë.
View this post on Instagram
Njoftimi i Policisë:
Lezhë
Drejtonte automjetin me leje drejtimi të hequr, si dhe tentoi të largohej me shpejtësi, duke rrezikuar jetën e punonjësve të policisë, por falë ndërhyrjes së menjëhershme dhe profesionale, drejtuesi i automjetit u neutralizua pa pasoja.
Rreth orës 12:00, në aksin rrugor Lezhë–Shkodër, në vendin e quajtur “Gajush”, shërbimet e Njësisë Operacionale për Sigurinë Rrugore dhe sigurinë e Autostradave, të caktuar me shërbim në Lezhë, i bënë shenjë për ndalim një automjeti që po kryente manovra të rrezikshme për përdoruesit e tjerë të rrugës.
Drejtuesi i mjetit, shtetasi J. D., 26 vjeç, banues në Lezhë, pas verifikimeve, rezultoi se drejtonte automjetin me leje drejtimi të hequr për një shkelje të mëparshme.
Në momentin e verifikimit të shkeljes dhe komunikimit të punonjësit të policisë për ta shoqëruar këtë të fundit për veprime të tjera në Drejtorinë Vendore të Policisë Lezhë, drejtuesi i mjetit ka refuzuar t’i bindet urdhërave të ligjshëm të punonjësit të policisë dhe me veprimet e tij për t’u larguar, ka paraqitur rrezik qartësisht të dukshëm për jetën e punonjësit të policisë, i cili, në kushtet e rrezikut të drejtpërdrejtë, real dhe të çastit dhe me qëllim parandalimin e një pasojë më të rëndë, përdori armën e shërbimit duke qëlluar në gomën e automjetit që drejtohej nga shtetasi J. D., duke bërë të mundur ndalimin e tij, ku gjatë kontrollit iu gjet edhe një armë e ftohtë pa leje nga organet kompetente.
Ngjarja është menaxhuar pa pasoja për jetën apo shëndetin e qytetarëve dhe punonjësve të policisë.
Drejtuesi i mjetit, shtetasi J. D., dhe pasagjeri që ndodhej me të, shtetasi E. S., 20 vjeç, të dy banues në Lezhë, janë shoqëruar në ambientet e Komisariatit të Policisë Lezhë, ku ndaj drejtuesit të mjetit po kryhen veprimet e nevojshme hetimore për veprat penale “Drejtimi i mjeteve në mënyrë të parregullt”, “Kundërshtimi i punonjësit të policisë së rendit publik”, si dhe “Prodhimi, mbajtja, blerja apo shitja pa leje e armëve të ftohta”, të parashikuara nga nenet 291, 236 dhe 279 të Kodit Penal.
Një grup i posaçëm hetimor nga strukturat përgjegjëse të Policisë së Shtetit dhe të Agjencisë së Mbikëqyrjes Policore, i drejtuar nga Prokuroria pranë Gjykatës së Juridiksionit të Përgjithshëm Lezhë, po kryen të gjitha veprimet hetimore për të sqaruar rrethanat e ngjarjes, si dhe kushtet e përdorimit të armës së zjarrit nga efektivi i Policisë, për neutralizimin e drejtuesit të automjetit.
