Një ndërhyrje e rrezikshme dhe heroike është regjistruar gjatë zjarrit në kompleksin 'Arlis', ku një efektiv i shërbimit zjarrfikës u vu në qendër të vëmendjes pasi shpëtoi një grua në kushte të vështira dhe pranë flakëve.
Sipas dëshmive në vendngjarje, zjarrfikësi u pa teksa ngjitej në shkallë shumë pranë zonës së përfshirë nga zjarri, duke arritur të evakuojë banoren në momentet kritike.
Për shkak të rrezikut nga rrëzimi i materialeve ndërtimore, ai i vendosi asaj edhe kaskën e tij mbrojtëse.
Shefi i shërbimit zjarrfikës, Jonus Murataj, ka treguar për situatën e vështirë dhe momentet e ndërhyrjes:
“Më tha lemë të digjem me gjithë shpi dhe i thashë eja se o ta shuajmë flakën brenda shtëpisë dhe do jetë prapë funksionale për ju. Isha i detyruar të shkoja sepse më njoftoi e bija,, e gjej zonjën të asfiksuar dhe ishte tmerruar…. Kokoren ia vendosa, sepse nga lartësitë kishte rënie të pjesëve metalike dhe tullat, dhe isha i detyruar t’ia vendosja sepse banori nuk është i specializuar që banori të zbresë nga autoshkalla”, u shpreh Murataj për TCH.
Ai theksoi gjithashtu se ndërhyrja e shpejtë e ekipit të zjarrfikësve shmangu përhapjen e flakëve në pjesë të tjera të kompleksit.
“Kemi bërë prerjen e zonës që zjarri të mos përhapej në pjesët e tjera. Në të njëjtën kohë kemi kryer evakuimin e banorëve dhe fikjen e zjarrit”, shtoi ai.
Sipas autoriteteve, ndërhyrja në kohë ishte vendimtare, pasi nëse flakët nuk do të izoloheshin, dëmet do të ishin shumë më të mëdha dhe mund të rrezikohej e gjithë godina.
Ekipi i zjarrfikësve ka qëndruar në terren gjatë gjithë natës dhe në vazhdim, pasi në disa momente janë riaktivizuar vatra të vogla, të cilat janë neutralizuar menjëherë./Versus.al
