Sektori i transportit publik në vend po përballet me një situatë të vështirë për shkak të rritjes së kostove, kryesisht nga shtrenjtimi i karburantit dhe mungesa e masave kompensuese nga institucionet.
Operatorët paralajmërojnë se nga java e ardhshme mund të ndërpritet shërbimi për rreth 450 linja urbane dhe interurbane në të gjithë vendin.
Shoqatat e Transportit Qytetas dhe ajo e Transportit Urban dhe Interurban i janë drejtuar sërish ministrive përgjegjëse Delina Ibrahimaj dhe Enea Karakaçi, duke kërkuar ndërhyrje urgjente dhe miratimin e një skeme kompensimi për karburantin, të ngjashme me atë të vitit 2022.
Sipas përfaqësuesve të sektorit, pas takimit të zhvilluar më 1 prill ishte premtuar një tjetër mbledhje më 7 prill, e cila nuk është mbajtur, ndërsa deri tani nuk ka asnjë reagim zyrtar nga institucionet.
Operatorët theksojnë se situata aktuale po rrit pasigurinë financiare dhe po e bën të pamundur vijimin normal të aktivitetit, duke paralajmëruar pasoja serioze për lëvizjen e qytetarëve në të gjithë vendin./Versus.al
