Europol ka dhënë detaje tronditëse mbi shkatërrimin e një rrjeti të madh kriminal të përfshirë në trafikimin e qenieve njerëzore, ku dhjetëra vajza të rekrutuara nga Amerika Latine, kryesisht nga Kolumbia, janë detyruar të prostituohen në disa vende europiane – përfshirë Shqipërinë si një nga pikat kryesore të shfrytëzimit.
Sipas njoftimit zyrtar të Europol, më 1 tetor 2025, janë zhvilluar bastisje të njëkohshme në Shqipëri dhe Kolumbi, gjatë të cilave:
U kryen 16 kontrolle banesash (7 në Shqipëri, 9 në Kolumbi);
U realizuan 17 arrestime, nga të cilat 7 në Shqipëri;
U identifikuan 54 viktima nga Amerika e Jugut – 44 prej tyre në Shqipëri, 5 në Kroaci dhe 5 në Kolumbi.
Hetimet zbuluan se rrjeti kriminal përbëhej kryesisht nga shtetas kolumbianë, por Shqipëria kishte rol kyç në fazën e shfrytëzimit seksual, ku vajzat e rekrutuara trajtoheshin si mall përfitimi. Në shumë raste, shfrytëzimi ndodhte në ambiente të mbyllura në qytete shqiptare, ndërkohë që shërbimet seksuale reklamoheshin në faqe online.
Roli i shqiptarëve në rrjetin kriminal
Autoritetet njoftuan se personat e arrestuar në Shqipëri ishin pjesë aktive e organizatës kriminale, duke mbuluar funksione të ndryshme si:
Strehimi dhe ruajtja e viktimave në apartamente të marra me qira;
Menaxhimi i kontakteve me klientët, nëpërmjet call center-ave të paligjshëm;
Sigurimi i kushteve për shfrytëzimin seksual dhe shpërndarja e fitimeve.
Hetuesit zbuluan gjithashtu një strukturë të sofistikuar të pastrimit të parave, ku gjysma e fitimeve të paligjshme kalonin përmes kanaleve të fshehta financiare, të menaxhuara nga organizatori kryesor i rrjetit.
Kjo ngjarje nxjerr në pah rolin gjithnjë e më aktiv të territorit shqiptar si një qendër operacionale për trafikimin e vajzave të huaja, dhe kërkon masa të forta institucionale për të luftuar krimin e organizuar ndërkombëtar që operon brenda dhe përtej kufijve të vendit.
