Kryebashkiaku i Tiranës, Erion Veliaj ka kërkuar shpalljen e pavlefshmërisë së emërimit të Ols Dados si prokuror. Sipas tij, ligji i kohës nuk e lejonte që Dado të emërohej nga noter në prokuror pa kryer më parë shkollën e Magjistraturës.
Me anë të një kërkese padi në gjykatën administrative të Tiranës, Veliaj kërkon pavlefshmëri të dekretit të emërimit të Dados në vitin 2008. Padia përfshin edhe institucionin e presidentit përgjatë periudhës 2007-2012, kohë kur president ka qenë Bamir Topi. Sipas padisë, emërimi i prokurorit është kryer në kundërshtim flagrant me ligjin, pasi në momentin e dekretimit ai nuk plotësonte kriteret ligjore të detyrueshme për ushtrimin e funksionit të prokurorit - pa shkollën përkatëse të Magjistraturës. Veliaj kërkon gjithashtu, që Këshilli i Lartë i Prokurorisë të detyrohet të marrë vendim për përfundimin e menjëhershëm të statusit të magjistratit dhe ushtrimit në mënyrë të paligjshme të detyrës të prokurorit në fjalë.
Dado është prokurori i posaçëm i SPAK që po heton dosjen e Erion Veliajt, për të cilën kryebashkiaku është marrë i pandehur për 5 vepra penale. Më herët Veliaj ka patur edhe shpërthime me akuza e epitete ndaj prokurorit të posaçëm. Versus.al
