Shërbimet sekret ruse kanë arrestuar miliarderin Konstantin Strukov, ndërsa ai po tentonte të largohej nga Rusia drejt Turqisë me avionin e tij privat. Strukov është aksioneri kryesor i një prej prodhuesve më të mëdhenj të arit në Rusi dhe njihet si një aleat i ngushtë i presidentit Putin. Por javën e kaluar, u përhapën informacione se shoqëria e tij mund të sekuestrohej nga shteti rus. Prej arrestimit të tij, paniku ka pushtuar të tjerët oligarkë rusë.
Informacioni është publikuar në kanalin Telegram, “VChK-OGPU”, i njohur për burimet e tij të besueshme: miliarderi rus Konstantin Strukov është ndaluar nga shërbimet sekrete ruse (FSB) në aeroportin e Çeliabinskut të shtunën e kaluar. Ai po planifikonte të fluturonte drejt Turqisë. Pamjet e kanë kapur atë duke u intervistuar në bord të avionit të tij të biznesit, Bombardier, që vlerësohet mbi 42 milionë euro.
Pasaportë e huaj
Pasaporta e tij e huaj u revokua nga Shërbimi i Migracionit pranë Ministrisë së Brendshme ruse dhe u sekuestrua, po ashtu edhe avioni. “Gjykatësi i ndaloi Strukovit dhe familjes së tij lëvizjen dhe udhëtimin jashtë vendit”, sipas “VChK-OGPU”.
Që prej javës së fundit, miliarderi akuzohet për korrupsion. Dyshohet se ka fituar në mënyrë të paligjshme aksione në shoqërinë Uzhuralzoloto (UGC). Prokurori dëshiron t’i heqë përqindjen e tij kryesore (67.85 %) në këtë kompani prodhuese të arit dhe t’ua kalojë ato shtetit rus. Një seancë gjyqësore parashikohet për këtë të martë. Ky rast shkaktoi rënien e kursit të aksioneve të UGC-së, deri në pikën që Bankës Qendrore të Rusisë i desh të pezullonte tregtimin e tyre të premten e kaluar.
Pasuria e Strukovit dhe familjes së tij vlerësohet nga revista ekonomike amerikane Forbes në 1.9 miliardë dollarë (rreth 1.6 miliardë euro). Kjo e vendos atë në pozitën e 2002-të në renditjen e njerëzve më të pasur në botë. Disa vende perëndimore i kanë vendosur sanksione për shkak të mbështetjes që ka ofruar ndaj qeverisë ruse. E njëjta gjë vlen edhe për UGC-në.
Panik
Si efekt i anës së errët të këtij rasti: shqetësimi është përhapur mes oligarkëve rusë. Nuk është hera e parë që shteti rus sekuestron pasuri të mëdha. Ritmi i këtyre veprimeve është përshpejtuar gjatë vitit të fundit. Në mesin e subjekteve të prekura gjenden një kompani e madhe tregtare drithrash, aeroporti Domodedovo në Moskë dhe disa depo strategjike për Rusinë.
Vadim Moshkovich, miliarder dhe themelues i një prej kompanive më të mëdha bujqësore në Rusi, Rusagro, ndodhet gjithashtu në paraburgim që nga fundi i marsit, i akuzuar për përvetësim fondesh, akuza që ai e mohon.
Sipas economistit Evgueni Nadorchine, Moska do të vazhdojë të sekuestrojë aktivet kombëtare në të ardhmen.
