Shtëpia e Bardhë publikoi të premten një seksion të ri në faqen e saj zyrtare, i cili kritikon publikisht dhe katalogon organizata mediatike dhe gazetarë që, sipas saj, kanë shtrembëruar raportimet.
Në krye të faqes shkruhet: “Mashtruese. E njëanshme. E ekspozuar.” Seksioni përmend Boston Globe, CBS News dhe The Independent si “shkelësit mediatikë të javës”, duke i akuzuar se kanë keqinterpretuar deklaratat e Trump lidhur me gjashtë ligjvënës demokratë që publikuan një video duke inkurajuar ushtarët të mos zbatojnë urdhra të paligjshëm.
“Salla e Turpit”
Faqja online përfshin gjithashtu një seksion të quajtur “Offender Hall of Shame” ku renditen Washington Post, CBS News, CNN dhe MSNBC (tani e njohur si MS Now). Vizitorët mund të kërkojnë në një bazë të dhënash të artikujve, së bashku me emrat e gazetarëve që i kanë shkruar ata. Çdo artikull kategorizohet me etiketa si “bias” (anshmëri), “malpractice” (keqpraktikim) ose “left wing lunacy” (marrëzi e krahut të majtë).
Një tabelë renditëse aktualisht vendos Washington Post në krye si shkelësi më i madh, me MSNBC dhe CBS News në vend të dytë e të tretë.
Lista e gjerë e mediave të akuzuara
Përveç “shkelësve të javës”, faqja e Shtëpisë së Bardhë liston edhe Associated Press, New York Times, Wall Street Journal, Politico dhe Axios si pjesë e mediave që ajo i akuzon për anshmëri ose dezinformim.
Publikimi i faqes shënon një përshkallëzim të ri në sulmet e vazhdueshme të Trump ndaj medias.
Ai vjen pas padive kundër Wall Street Journal dhe New York Times, marrëveshjeve ligjore me ABC dhe CBS, si dhe përsëritjes së deklaratave të tij të njohura ku mediat kryesore i quan “armik i popullit”.
Sulmet ndaj gazetareve femra
Në javët e fundit, Trump ka ashpërsuar edhe sulmet personale ndaj gazetareve femra. Më herët këtë muaj, ai e quajti një korrespondente të Bloomberg News “piggy” gjatë një përplasjeje në bordin e Air Force One, pasi presidenti u pyet për dosjet Epstein.
Pak ditë më vonë, pasi një gazetare e ABC News e pyeti për vrasjen e Jamal Khashoggit dhe skandalin Epstein, Trump iu përgjigj duke e quajtur “njeri të tmerrshëm”.
Javën e kaluar, në një postim në Truth Social, Trump e quajti një korrespondente të New York Times “një gazetare të dorës së tretë, e shëmtuar nga brenda dhe nga jashtë”, pasi ajo bashkëshkroi një artikull që sugjeronte se presidenti po shfaqte lodhje në vitin e tij të 80-të./Versus.al
