Në takimin në Shtëpinë e Bardhë, duke folur përkrah udhëheqësve evropianë dhe Donald Trump, Volodymyr Zelenskyy thotë se grupi pati një "bisedë shumë të mirë".
Zelensky nënvizoi rëndësinë sipas tij që ka vendosmëria e Trump që Shtetet e Bashkuara të jenë garantorët e sigurisë në rast të arritjes së marrëveshjes për të ndalur luftën.
"Folëm për pika shumë të ndjeshme. E para janë garancitë e sigurisë. Siguria në Ukrainë varet nga Shtetet e Bashkuara, nga ju dhe nga ata udhëheqës që janë me ne në zemrat tona. Shumë vende janë në anën e Ukrainës, popullit tonë dhe të gjithë ne duam ta përfundojmë këtë luftë. Do të flasim më shumë për garancitë e sigurisë. Është shumë e rëndësishme që Shtetet e Bashkuara japin sinjale kaq të forta dhe janë gati për garanci sigurie”, tha Zelensky nga tryeza e liderëve.
Ai falënderon përsëri Melania Trump për letrën e saj drejtuar Vladimir Putinit në lidhje me fëmijët e rrëmbyer ukrainas, siç bëri në Zyrën Ovale më parë.
"Ajo që është shumë e rëndësishme është që të gjitha gjërat e ndjeshme, territoriale etj., do t'i diskutojmë në nivelin e udhëheqësve gjatë takimit trepalësh dhe Presidenti Trump do të përpiqet të organizojë një takim të tillë."
Zelenskyy shtoi se i ka treguar presidentit Trump shumë detaje për fushën e betejës. “Ia tregova në hartë. Faleminderit për hartën, meqë ra fjala”, tha lideri ukrainas.
Trump dhe Zelenskyy më pas bënë shaka me mirësjellje për t'u siguruar që Presidenti i Ukrainës mund ta marrë hartën me vete në shtëpi.
