Shqipëria është në prag të një transformimi të madh turistik. Mediat ndërkombëtare, si gazeta britanike “Express”, e përshkruajnë tashmë vendin si një destinacion që së shpejti mund të “pushtohet” nga një valë e re turistësh, tërhequr nga bukuritë natyrore dhe zhvillimi i shpejtë i infrastrukturës turistike.
Një bum turistik në rritje
Shifrat flasin vetë. Në vitin 2015, vendi mikpriti mbi 3 milionë vizitorë, ndërsa deri në vitin 2019 kjo shifër u dyfishua në 6 milionë. Por pas pandemisë, ritmi i rritjes është bërë edhe më i vrullshëm: në vitin 2023 mbërritën rreth 10 milionë turistë, duke shënuar një rritje prej 56% krahasuar me nivelet para-COVID.
Sipas parashikimeve të qeverisë shqiptare, vendi mund të presë deri në 30 milionë turistë të huaj deri në vitin 2030, një shifër që do ta vendoste Shqipërinë përpara vendeve të konsoliduara turistike si Portugalia apo Kroacia.
Renditja globale: Shqipëria në Top 3 për rritjen më të shpejtë të turizmit
Në nivel global, Shqipëria renditet e treta për rritjen më të shpejtë të industrisë turistike në periudhën 2019–2023. Ajo pasohet vetëm nga Katari, me një rritje prej 89%, dhe Porto Riko, me 58%.
Investime të mëdha dhe atraksione të jashtëzakonshme
Të huajt nuk po qëndrojnë pasivë përballë këtij potenciali. Jared Kushner dhe Ivanka Trump, figura të njohura në arenën ndërkombëtare, kanë marrë dritën jeshile për një projekt ambicioz: ndërtimin e një hoteli luksoz prej 1.4 miliardë dollarësh në ishullin e Sazanit, një destinacion ende i paprekur për turizmin masiv.
Por bukuria e Shqipërisë shkon përtej investimeve të mëdha. Vendi ofron atraksione natyrore si Syri i Kaltër, Parku Kombëtar i Butrintit, teleferiku në Dajti, kështjella historike, si dhe plazhe me rërë të artë dhe resorte buzë detit që po fitojnë gjithnjë e më shumë vëmendje në rrjetet sociale dhe mediat ndërkombëtare.
Një perlë e zbuluar
Dikur një “perlë e fshehur” e Mesdheut, Shqipëria po kthehet në një emër të madh në hartën globale të turizmit. Me temperatura të larta verore, çmime të përballueshme dhe një mikpritje të ngrohtë, ajo ofron një alternativë tërheqëse ndaj vendeve të mbipopulluara turistike në Evropë. /Versus.al
Të parët nga fundi...“Fitoret” e padëshiruara të Shqipërisë
Shqiptarët kursejnë më shumë: 1.38 trilionë lekë në banka
