Një nga misteret më legjendare të muzikës rock po shndërrohet në film. Kitara bas 'Höfner' i Paul McCartney, e vjedhur 51 vjet më parë dhe e rizbuluar në vitin 2024, është fokusi i një dokumentari të ri, “The Beatle and the Bass”, me regji nga Arthur Curry.
Filmi është prodhuar nga Passion Pictures, e cila fitoi një çmim BAFTA këtë vit për dokumentarin e saj “Super/Man: The Christopher Reeve Story” në Festivalin e Filmit Sundance, dhe do të shfaqet nga BBC Arts. Njoftimi u bë si pjesë e 50-vjetorit të serisë dokumentare të BBC Arena, së bashku me “Turner: The Secret Sketchbooks”.
Filmi tregon historinë e papritur të instrumentit legjendar, që nga zhdukja e tij në fillim të viteve 1970 deri në rikthimin e tij vitin e kaluar, pas gjysmë shekulli kërkimesh dhe spekulimesh. Höfner-i origjinal u ble nga McCartney në vitin 1961, kur ai ishte 18 vjeç dhe një muzikant i panjohur në Hamburg, për 30 paund. Basi e shoqëroi atë gjatë gjithë karrierës së Beatles, derisa u zhduk në mënyrë misterioze dhe mendohej se ishte humbur përgjithmonë.
Paul McCartney do të shfaqet në dokumentar, duke thënë në mënyrë karakteristike: "Mendoj se çdo gjë që të vidhet, e do përsëri, veçanërisht nëse ka vlerë sentimentale. Thjesht u zhduk në univers dhe na la të pyesnim veten, ku shkoi? Duhet të ketë një përgjigje."
Filmi përmban gjithashtu intervista me vëllain e tij, Mike McCartney, mikun dhe artistin Klaus Voormann, i cili i njihte Beatles që nga fillimi, bashkëpunëtorë si Elvis Costello dhe fansa. Ekipi që qëndron pas “The Lost Bass Project”, i cili mori përsipër gjetjen e instrumentit, shpëtimin dhe restaurimin e tij, do të ketë një vend të veçantë.
