Kryetari i Partisë Demokratike, Sali Berisha, akuzoi kryeministrin Edi Rama se po dezinformon publikun lidhur me interpretimet e Komisionit të Venecias për çështjen e pezullimit të ministrave nga detyra. Sipas Berishës, Rama po përdor “avokatinë e turpshme” për të mbrojtur veten dhe ministren Belinda Balluku në aferën e tunelit të Llogarasë, ndërsa, siç shprehet ai, ushtron presion ndaj Gjykatës Kushtetuese.
Berisha thekson se deklaratat zyrtare të Diellës, platformës qeveritare që publikon informacionet e institucioneve, tregojnë se Komisioni i Venecias nuk ka asnjë raport të lidhur me pezullimin e ministrave. Sipas tij, opinione të Komisionit ekzistojnë vetëm për raste që lidhen me të zgjedhurit vendor, jo me anëtarë të kabinetit qeveritar. Kjo, sipas Berishës, krijon një kontradiktë të drejtpërdrejtë mes asaj që thotë kryeministri dhe asaj që pretendohet në dokumentet zyrtare.
Në deklaratën e tij, Berisha shkruan:
“Të dashur miq,
Edi Rama sot, në avokatinë e tij të turpshme të vjedhjeve me Lubi Ballukun në tunelin e Llogarasë dhe në një presion të hapur ndaj Gjykatës Kushtetuese, u tha shqiptarëve se Komisioni i Venecias është shprehur kundër pezullimit të ministrave nga detyra.
Kurse Diella thotë se nuk ka asnjë raport të Komisionit të Venecias për pezullime ministrash – as konkret, as në tërësi – por ka vetëm raporte që lidhen me të zgjedhur vendor.
Pyetja ime është: kush gënjen?
Diella apo Rama?
Apo kujt t’i besojmë: Diellës që është e paanshme, apo Ramës të zhytur gjer në vesh në aferën e pistë të tunelit të Llogarasë?”
