Në kuadër të Javës Kulturore Europiane dhe nën moton e Bashkimit Europian “Të bashkuar në diversitet”, ambasadori i BE-së në Shqipëri, Silvio Gonzato, zgjodhi të flasë në vetën e parë gjatë një interviste për emisionin “Dita Jonë” në A2 CNN, ku ndau hapur edhe prirjen e tij seksuale.
Duke folur për projektet e shumta kulturore që po zhvillohen jo vetëm në Tiranë, por edhe në qytete të tjera të vendit, përfshirë dhe fshatin Pilur në Vlorë, ambasadori solli në vëmendje ekspozitën fotografike të artistes Blerta Kambo, me temë dashurinë.
Ai theksoi se kjo ekspozitë portretizon forma të ndryshme dashurie, përtej lidhjeve tradicionale mes një burri dhe një gruaje.
Ambasadori Gonzato foli gjithashtu për sfidat që hasen ende në shoqëri kur trajtohen tema të tilla, duke nënvizuar se është e nevojshme një ndryshim në mentalitet dhe qasje për të ndërtuar një shoqëri më gjithëpërfshirëse dhe të hapur ndaj diversitetit.
“Tema kryesore është krijimi kësaj hapësire në të cilën njerëzit të ndërveprojnë në mënyrë të lirshme dhe të formësojnë vizionin e tyre për BE. Do të kemi disa teatër. Një tjetër është ekspozitë nga Blerta Kambo; Dashuria është e njëjtë për të gjithë aty protretizohen mënyra të ndryshme dashurie, jo vetëm mes një femër dhe një mashkulli. Besoj se njerëzit e dinë që jam homoseksual, por nuk abuzoj me pozicionin që kam. U zhgënjeva pasi kemi patur vështirësi për të gjetur vendin ku do të organizohej, se njerëzit thoshin nuk do t’i tregojmë këto fotografi se kemi fëmijë, por ato janë foto me dashuri. Janë thjesht fotografi. Në Shqipëri duhet të arrihet ky ndryshim i mendësisë. Njerëzit të pranojnë larminë dhe mendoj që kjo do të japë efektin e vet. Kemi muzikë dhe tematika të tjera si emigracioni që prek shqiptarët dhe marrëdhënia mes gjuhës e pushtetit. Të gjitha këto për të simuluar reflektim për sfidat me të cilat përballemi. Kultura është mjet i fuqishëm për të tejkaluar kufijtë dhe prandaj e bëmë këtë në partneritet me artistët”.
Duke shpjeguar më tej deklaratën e tij publike mbi homoseksualitetin, Gonzato me sinqeritet rrëfeu në A2 CNN vështirësitë dhe tha se kjo nuk është kërcënim për njerëzit dhe nuk abuzon me pozicionin e tij.
“Është e vështirë sot të ekspozohesh në këtë formë dhe bëhesh i cenueshëm, por më pëlqen të jem i sinqertë. Nuk kam diçka për të fshehur. Të shprehesh se kush je në të vërtetë nuk është e lehtë por e rëndësishme të jesh i ndershëm. Mënyra si jam unë nuk është kërcënim për ju dhe ndjenjat që kam janë të njëjta me ju. Po ne jemi ndryshe, jemi me këtë diversitet dhe jemi edhe të njëjtë. Me pëlqen edhe ideja e ekspozitës ne kemi një thelb njerëzor dhe ju ndoshta e dini që unë kam qenë i martuar me një femër dhe më pas u martova me një burrë dhe problemet janë njësoj”.
