Ministria e Mbrojtjes ka dhënë detaje mbi situatën në vend sa i takon vatrave të zjarrit që janë shfaqur në qarqe të ndryshme me rritjen e temperaturave.
Në total janë raportuar 7 vatra zjarri dhe janë shuar 5 prej tyre. Dy të mbeturat, në Himarë po shkrumbojnë sipërfaqe të tëra toke prej thuajse dy ditësh, ndërsa në Kukës ndotja e krijuar nga djegia e mbetjeve ka sjellë masakër mjedisore duke ua bërë banorëve tepër të vështirë jetesën.
Për shuarjen e këtyre vatrave, janë organizuar në total 1 helikopter i Forcave të Armatosura, 12 zjarrfikës dhe 40 efektivë të FA.
Njoftimi i plotë:
Sipas të dhënave nga Qendra Kombëtare Operacionale e Emergjencave Civile në AKMC, deri në orën 12:00, datë 23.06.2025, janë raportuar 7 vatra zjarri.
Nga këto janë shuar 5 vatra zjarri dhe janë aktive 2 vatra zjarri.
Pas një pune të pandërprerë të forcave operacionale në terren u bë i mundur izolimi i plotë dhe shuarja e vatrave në:
1. Në lagjen “Mulliri i Artë”, bashkia Delvinë.
2. Në fshatin Alarup, njësia administrative Çërravë, bashkia Pogradec.
3. Në në rrugën e Elbasanit, njësia administrative Nr. 2, bashkia Tiranë.
4. Në fshatin Rilë, njësia administrative Shënkoll, bashkia Lezhë.
5. Në fshatin Malaj, njësia administrative Rrëshen, bashkia Mirditë.
Aktualisht, janë aktive vatrat në:
Qarku Vlorë
1. Në fshatin Llaman, bashkia Himarë, vatra e zjarrit është ende aktive, janë duke operuar: 3 automjete zjarrfikëse me 12 efektivë të MZSH Himarë, 40 efektivë FA nga DRM Gjirokastër me 4 automjete transporti dhe 1 helikopter i FA.
Në mbështetje nga bashkia Himarë në terren janë edhe 30 forca nga Shërbimi Pyjor, nga Ndërmarrja e Shërbimeve Publike Himarë, nga njësitë administrative Himarë, Horë – Vranisht dhe Lukovë.
Qarku Kukës.
2. Në fshatin Kolsh, njësia administrative Mamëz, bashkia Kukës, po punohet për fikjen e zjarrit të rënë në vendgrumbullimin e mbetjeve urbane, situata drejt përmirësimit. Versus.al
