Ilir Budlla, specialist trafiku me një karrierë 33-vjeçare në Policinë e Shtetit, ka ndërruar jetë këtë të enjte gjatë ushtrimit të detyrës në kryeqytet.
Burime nga policia bëjnë me dije se ai u ndje keq ndërsa po punonte me shërbimet e Qarkullimit Rrugor dhe pësoi një arrest kardiak, duke u ndarë nga jeta në moshën 58-vjeçare.
Drejtoria e Përgjithshme e Policisë së Shtetit i shprehu ngushëllimet familjes së Budllës, duke theksuar se humbja e tij është një dhimbje e madhe për kolegët dhe gjithë institucionin.
Në ceremoninë e fundit, Drejtori i Përgjithshëm Sokol Bizhga, së bashku me drejtorët e departamenteve Neritan Nallbati dhe Dhimitraq Ziu, vendosën kurora dhe i dorëzuan familjarëve Certifikatën e Karrierës, duke nderuar përkushtimin dhe integritetin e Budllës gjatë mbi tre dekadash shërbimi.
Ilir Budlla do të kujtohet si një punonjës korrekt, i përkushtuar dhe me devotshmëri ndaj qytetarëve dhe ligjit, duke lënë një trashëgimi të vyer në Policinë e Shtetit.
