Gjykata Kushtetuese ka marrë një vendim të rëndësishëm në mbrojtje të lirisë së medias dhe të drejtës së gazetarëve për të ruajtur konfidencialitetin e burimeve. Vendimi erdhi pas shqyrtimit të kërkesës së gazetarit Elton Qyno, i cili kishte kundërshtuar kontrollet e ushtruara nga SPAK në banesën dhe zyrën e tij, si dhe sekuestrimin e mjeteve të punës.
Sipas Gjykatës Kushtetuese, sekuestrimi i kryer nga strukturat hetimore ka qenë në kundërshtim me të drejtat kushtetuese të gazetarit, duke ndërhyrë drejtpërdrejt në lirinë e shprehjes dhe në të drejtën për të mbrojtur burimet e informacionit. Vendimi ishte unanim, duke shfuqizuar aktet e mëparshme të gjykatave më të ulëta.
“Nuk ishte kjo mënyra për të zbuluar burimet e gazetarit,” deklaroi kryetarja e Gjykatës Kushtetuese, Holta Zaçaj, gjatë një konference për shtyp. Ajo sqaroi se vendimi përbën një pranim të pjesshëm të kërkesës së gazetarit, duke theksuar se sekuestrimi është shpallur i paligjshëm, ndërsa çështja e kontrollit fizik të banesës dhe zyrës mbetet e hapur, pasi avokati i gazetarit ka rezervuar të drejtën për të ndjekur një padi të mëvonshme.
Gjykata gjithashtu kritikoi gjykatat më të ulëta për mungesë arsyetimi mbi domosdoshmërinë e përdorimit të masave kaq ndërhyrëse, duke theksuar se ato nuk kishin paraqitur shpjegime se përse nuk u përdorën mjete më të buta për të identifikuar burimin e informacionit.
Ky vendim shënon një precedent të rëndësishëm në mbrojtjen e të drejtave të gazetarëve në Shqipëri, duke riafirmuar parimin se mbrojtja e burimeve gazetareske është një garanci themelore për lirinë e medias. /Versus.al/
