Ditën e djeshme Versus.al publikoi pjesë nga dosja hetimore për operacionin antidrogë të zhvilluar nga autoritetet italiane në Breshia në bashkëpunim me SPAK-un, ku u godit sërish grupi me drejtues kryesor, Elvis Doçi i njohur ndryshe si ‘Visi i Pojës’.
Gjithashtu u zbardhën edhe bisedat që agjenti i antiterrorit, Igli Haxhiaj zhvillonte me anëtarë të grupit të cilëve u ofronte informacione në këmbim të pagesave deri në 15 mijë euro. Por jo vetëm kaq, Haxhiaj rezulton të jetë i përfshirë edhe në trafikun e drogës, pasi asokohe si oficer i Forcave Operacionale, kishte negociuar çmime për blerjen e kokainës nga trafikantët e këtij grupi.
Në bisedat e zbardhura nga aplikacioni SkyEcc, Haxhiaj u kërkon anëtarëve të grupit cilësi të lartë të kokainës duke u bërë me dije gjithashtu se kishte kontakte në disa shtete nga ku mund të siguronte transportin e saj drejt Shqipërisë. Në mars të 2023-it, Haxhiaj pyet një prej anëtarëve të grupit për “mall të mirë me çmim, ndërsa personi tjetër ende i paidentifikuar i ofron “Holandë 29”.
Pjesë nga përgjimet e zbardhura:
Haxhiaj: Vlla si e ke punën andej… A ke noi mall të mirë me çmim?
SEJRCV: Si e kom hajde mo tu lëviz për me bo lekët si gjithmonë. Ku ? Kam Holandë me 29 me duket.. Ma ofruan para ca ditësh, origjinal… Se t’përzim kam plot me 25 po te hy ne punë me luspa me krejt.
I.Haxhiaj: Qenka shtrenjta, kuptoj… Po prapë është duke u dhen me aq.
Dy anëtarët e grupit kanë shkëmbyer shpesh foto të kokainës, e cila dallohet me mbishkrime të ndryshme, si “bebe”, “111”, “rolex” (një prej markave luksoze të orave) apo “CR7” (lojtari Cristiano Ronaldo).
FM369H: Kjo është, nuk e di sa ka akoma gjendje duhet me pyt.. me 28 mund ta le ty… Fol e me thuaj, t’jap një për prove e shife. Por me këta jemi me lek ne dore
.Haxhiaj: Kuptoj file… Ca çmimi.. A është e mire?... Me lek ne dore se pa lek s’dua unë… A është e mirë di gjë?
FM369H: Merreni një për test dhe vendosni. Mgjth duhet ti pyes nëse ka ngel dhe sa… Flit me njerëzit dhe nëse janë ok, të flas për gjendjen unë.
Nga përmbajtja e bisedës më sipër, anëtari i grupit i ofron Haxhiajt mall me çmim “28”, duke i sugjeruar që ta marrë “një për provë”. Ish-efektivi kërkon informacion për cilësinë dhe shprehet “me lek në dorë se pa lek s’dua”.
Në një tjetër bisedë në SkyECC anëtari i grupit deklaron se ka “një copë në Athinë”, duke shpjeguar se “ajo ngarkesë është… pml, a body, rolex… nuk e di fiks, por ajo punë është”. Ai i shpjegon skemën e çmimeve: “29k blerja, 2k transporti, 31k… e marrim 30k”.
Në seancën e zhvilluar ditën e djeshme, gjykata la në burg Haxhiajn i cili mohoi që të kishte përdorur aplikacionin “SkyEcc’ duke thënë se dikush tjetër ka përdorur emrin e tij. Versus.al
