Gazetari shqiptar Artan Hoxha është shpallur “person non grata” në Greqi, me një urdhër ndalimi të përjetshëm për të hyrë në territorin grek.
Mediat greke, konkretisht Protothema.gr, raportojnë se autoritetet e Kakavijës i komunikuan Hoxhës ndalimin me arsyetimin zyrtar se “konsiderohet kërcënim për rendin publik dhe sigurinë e brendshme”.
Në artikullin e tyre, Protothema thekson se një nga arsyet e këtij vendimi ishte dhe protesta e hapur e Hoxhës në fshatin Konicë të Janinës për mungesën e flamurit shqiptar, si dhe promovimi i idesë së “Shqipërisë së Madhe”.
Sipas Protothema, vizita e gazetarit në Konicë dhe deklaratat e tij në rrjetet sociale, në vitin 2024 si dhe shfaqja e simbolit të Shqipërisë së Madhe në urën historike të fshatit, janë konsideruar të papranueshme nga autoritetet greke dhe kanë ndikuar drejtpërdrejt në masën e ndalimit.
Gjithashtu media greke ka publikuar dhe një video të Versus.al, e cila flet për ndalimin e dy gazetarëve shqiptarë, Artan Hoxha dhe Marin Memës nga autoritetet greke.
Në shkrimin e saj media greke flet dhe për reagimin nga Unioni i Gazetarëve Shqiptarë ku shkruan:
Reagimi i Unionit të Gazetarëve Shqiptarë (UGSH) ishte i fortë, duke e quajtur atë një "masë ekstreme" dhe duke pretenduar se Greqia ka rritur "në mënyrë të paarsyeshme" ndalimet ndaj gazetarëve shqiptarë, megjithatë, pa iu referuar postimeve dhe deklaratave të tij.
UGSH deklaron se "ndalime të ngjashme janë vendosur në të kaluarën ndaj gazetarëve Marin Mema dhe Enrik Mehmeti, ndërsa gazetarë të tjerë janë ndaluar ose vonuar në kufij dhe aeroporte", duke shtuar se këto u vendosën "pa justifikim të qartë".
Në deklaratën e saj, Unioni gjithashtu pretendon se " qarqet e ekstremizmit politik dhe nacionalist në Greqi po ndikojnë në shërbimet e sigurisë " dhe bën thirrje për ndërhyrjen e Ministrisë së Jashtme dhe Punëve të Jashtme të Shqipërisë, si dhe të organizatave ndërkombëtare për lirinë e shtypit. Athina ka shprehur vazhdimisht shqetësim për rastet e gazetarëve të përfshirë në retorikë ose praktika nacionaliste që konsiderohen se dëmtojnë sigurinë publike./Versus.al
