Një nënë britanike ka shprehur dëshpërimin pasi vajza e saj, Mia O’Brien, një studente drejtësie nga Mbretëria e Bashkuar, raportohet se është dënuar me burgim të përjetshëm në Dubai.
Sipas nënës së saj, Danielle McKenna, 23-vjeçarja ka bërë një “gabim shumë të papjekur” dhe është përfshirë me shoqëri të gabuar, gjë që çoi në burgosjen e saj në Emiratet e Bashkuara.
McKenna, 46 vjeçe, ka nisur një fushatë për mbledhjen e fondeve që të mbulojë shpenzimet ligjore dhe udhëtimet për të vizituar vajzën e saj.
“Mia ka marrë një dënim të përjetshëm dhe tani ndodhet në burgun qendror,” shkruan ajo.
“Siç mund ta imagjinoni, si nënë jam absolutisht e shkatërruar. Nuk e kam parë vajzën time që nga tetori i kaluar. Mia është vetëm 23 vjeç dhe kurrë nuk ka bërë diçka të keqe, por për fat të keq u përfshi me disa shokë të gabuar dhe bëri një gabim shumë të papjekur, për të cilin tani po paguan çmimin.”
Familja nuk ka dhënë detaje për krimin për të cilin Mia është dënuar, por autoritetet e Emirateve të Bashkuara zakonisht japin dënime të përjetshme për trafik droge, dhunë të rëndë, terrorizëm dhe trafikim njerëzor.
Në Emirate, një burgim i përjetshëm zakonisht përkthehet në 15 vjet burg.
Ministria Britanike për Punët e Jashtme (FCDO) paralajmëron turistët se nuk ka tolerancë për shkeljet e lidhura me drogën, duke përfshirë edhe sasi të vogla, të cilat mund të sjellin gjoba të mëdha ose burgim.
Një zëdhënës i FCDO-së konfirmoi se autoritetet britanike po mbështesin familjen e Mia-s dhe janë në kontakt me autoritetet lokale në Dubai.
Danielle McKenna tha gjithashtu se fondet e mbledhura do të përdoren për shpenzimet ligjore dhe vizitat në Dubai, duke theksuar se askush nga familja nuk ka parë Mia-n që nga tetori i kaluar./Marrë nga Yahoo.com
