Në një deklaratë të fuqishme që rrezikon të përshkallëzojë tensionet me Rusinë, presidenti ukrainas Volodymyr Zelensky konfirmoi se “mijëra ushtarë perëndimorë” mund të dislokohen në Ukrainë pas një marrëveshjeje të mundshme armëpushimi me Rusinë.
“Po flasim për një forcë që mund të numërojë mijëra trupa. Ky është një fakt, edhe pse është ende herët për të dhënë detaje konkrete,” u shpreh Zelensky gjatë një konference për shtyp me presidentin e Këshillit Evropian, Antonio Costa, në perëndim të Ukrainës.
Deklaratat e Zelensky vijnë pas njoftimit të presidentit francez Emmanuel Macron, i cili bëri me dije se 26 vende janë të angazhuara për të garantuar sigurinë e Ukrainës pas përfundimit të luftës, përfshirë me forca tokësore, detare dhe ajrore.
Fillimisht, Macron la të kuptohej se trupat do të vendoseshin fizikisht në territorin ukrainas. Por më pas sqaroi se disa vende do të ndihmojnë nga distanca, përmes trajnimit dhe pajisjes së ushtrisë ukrainase, pa qenë të pranishëm në terren.
Reagon Rusia
Presidenti rus Vladimir Putin reagoi menjëherë, duke deklaruar se çdo trupë perëndimore në territorin ukrainas do të konsiderohet si objektiv legjitim për forcat ruse.
Kjo deklaratë përforcon frikën e një përshkallëzimi të drejtpërdrejtë ushtarak midis NATO-s dhe Rusisë, nëse forcat e huaja vendosen realisht në Ukrainë.
Ndërkohë që diskutimet për garancitë e sigurisë po intensifikohen në skenën ndërkombëtare, një gjë është e qartë: e ardhmja e Ukrainës nuk do të përcaktohet vetëm në fushën e betejës, por edhe në tryezat e diplomacisë dhe aleancave strategjike. / Versus /
