Autoritetet në të gjithë Evropën janë në gatishmëri ndërsa vala e parë e të nxehtit të verës i çon temperaturat deri në 42°C, ndërsa kontinenti që po ngrohet më shpejt vazhdon të vuajë efektet e emergjencës klimatike.
Zyra shtetërore meteorologjike e Spanjës, Aemet, lëshoi një paralajmërim të posaçëm për nxehtësinë të premten, duke thënë se temperaturat mund të arrijnë në 42°C në disa zona jugore të vendit gjatë ditëve në vijim.
"Priten temperatura shumë të larta dhe të vazhdueshme, si gjatë ditës ashtu edhe gjatë natës, të cilat mund të përbëjnë një rrezik për njerëzit e ekspozuar dhe/ose të prekshëm", tha Aemet.
Ministria e shëndetësisë e Madridit gjithashtu paralajmëroi njerëzit të tregojnë kujdes shtesë gjatë vapës, duke u kujtuar atyre të qëndrojnë larg diellit, të qëndrojnë të hidratuar dhe t'u kushtojnë vëmendje të madhe atyre që janë të moshuar, shtatzënë ose që kanë probleme kronike shëndetësore.
Dy të tretat e Portugalisë do të jenë në gatishmëri të lartë të dielën për nxehtësi ekstreme dhe zjarre pyjore, pasi priten temperatura deri në 42°C në Lisbonë.
Ndërsa temperaturat në Marsejë i afrohen 40 gradë Celsius, autoritetet në qytetin e dytë më të madh të Francës kanë urdhëruar që pishinat publike të bëhen falas për të ndihmuar banorët të përballojnë vapën mesdhetare.
Me temperaturat maksimale që priten në Napoli dhe Palermo deri në 39 gradë Celsius, Siçilia ka urdhëruar ndalimin e punës në natyrë në orët më të nxehta të ditës, ashtu si edhe rajoni i Ligurias në Italinë veriore. Sindikatat e vendit po bëjnë fushatë për ta zgjeruar masën në rajone të tjera. Versus.al
