Një deklaratë e presidentit amerikan Donald Trump, ku ai u shpreh se ekziston një trajtim që “ngjall të vdekurit”, është përhapur me shpejtësi në rrjetet sociale, duke shkaktuar reagime dhe interpretime të ndryshme.
Gjatë një komunikimi rutinë me gazetarët në Shtëpinë e Bardhë, Trump foli për raste pacientësh shumë të sëmurë që, sipas tij, kanë pasur përmirësime pas marrjes së trajtimeve eksperimentale të autorizuara në kushte të veçanta.
“Kemi marrë njerëz që ishin të vdekur… Kishim një person që kishte marrë ritin e fundit fetar, familja po qante, dhe nisën t’i jepnin këtë ilaç. Dhe personi u përmirësua. Funksionon”, u shpreh ai.
Këto fjalë u interpretuan në mënyra të ndryshme në internet, duke u shpërndarë si një pretendim për një “ilaç që ringjall të vdekurit”, megjithëse më pas u sqarua se deklarata ishte nxjerrë jashtë kontekstit.
Në fakt, presidenti i referohej ligjit amerikan “Right to Try Act”, i miratuar gjatë administratës së tij të parë, i cili u jep pacientëve me sëmundje të pashërueshme mundësinë të provojnë trajtime eksperimentale që nuk kanë kaluar ende të gjitha fazat e miratimit zyrtar dhe shpesh konsiderohen me rrezik të lartë.
Sipas këtij ligji, pacientët në gjendje terminale mund të kenë akses në terapi të reja që janë ende në fazë testimi klinik, por vetëm në kushte të caktuara dhe me pëlqimin e tyre.
Megjithatë, siç kanë vënë në dukje edhe analistë dhe media ndërkombëtare, interpretimi i efekteve të “Right to Try Act” mbetet i debatueshëm. Disa studime kanë theksuar se pacientët kishin edhe më parë mundësi të ngjashme për të provuar trajtime eksperimentale, ndërsa ligji ka ndryshuar kryesisht aspektin ligjor të përgjegjësisë dhe mbrojtjes së kompanive farmaceutike dhe mjekëve.
Në rrjetet sociale, deklarata e Trump është komentuar gjerësisht, me shumë përdorues që e kanë keqkuptuar si pretendim për një “kurë mrekullibërëse”, ndërsa të tjerë kanë theksuar se bëhet fjalë për një mënyrë të ekzagjeruar të shprehjes për raste të rralla mjekësore ku pacientë shumë të rëndë kanë reaguar pozitivisht ndaj trajtimeve të reja.
Debati rreth ligjit dhe mënyrës së komunikimit të presidentit ka rikthyer diskutimet në SHBA mbi transparencën e deklaratave politike dhe ndikimin që ato kanë në perceptimin publik për çështje të ndjeshme si shëndetësia dhe trajtimet eksperimentale./Versus.al
View this post on Instagram
