Budapest, 23 prill 2026 – István Tiborcz, dhëndri i ish-kryeministrit Viktor Orbán, është vënë në qendër të vëmendjes ndërkombëtare për shkak të operacioneve financiare të lidhura me zgjedhjet e fundit në Hungari.
Sipas raportimeve, një fond investimi i grupit Equilor Asset Management, ku Tiborcz është pjesërisht aksionar, ka realizuar fitime të mëdha duke investuar në tregjet financiare para zgjedhjeve të 12 prillit. Fondi kishte marrë pozicione të rëndësishme në obligacione shtetërore dhe aksione hungareze, duke parashikuar fitoren e koalicionit të udhëhequr nga Péter Magyar.
Pas rezultatit zgjedhor, vlera e këtyre aseteve u rrit ndjeshëm, e nxitur nga pritshmëritë për një politikë ekonomike më të afërt me Bashkimi Evropian dhe perspektiva për adoptimin e euros në të ardhmen.
István Tiborcz konsiderohet një nga figurat kyçe të perandorisë ekonomike të ndërtuar rreth rrethit të Viktor Orbán. Ai zotëron një pasuri të konsiderueshme, të përllogaritur mes 150 dhe 210 miliardë forintësh, dhe ka investime në sektorë të ndryshëm përmes grupit BDPST Group, duke përfshirë hotele luksoze, resorte, pasuri të paluajtshme dhe sigurime.
Gjatë fushatës zgjedhore, kryeministri i ri Péter Magyar ka kritikuar ashpër pasurimin e shpejtë të figurave të lidhura me qeverinë e mëparshme, duke paralajmëruar hetime mbi interesat ekonomike të tyre.
Zhvillimet e fundit e vendosin Tiborcz në qendër të debatit mbi marrëdhëniet mes pushtetit politik dhe biznesit në Hungari, ndërsa ardhja në pushtet e Péter Magyar pritet të sjellë ndryshime të rëndësishme në balancat ekonomike dhe politike të vendit.
