Në procesin e apelit për çështjen e dyshimeve mbi financimin libian të fushatës presidenciale të vitit 2007, ish-presidenti francez Nicolas Sarkozy është vënë në qendër të akuzave të forta nga prokuroria, e cila e cilëson atë si “nismëtar” të një shoqate keqbërësish.
Në ditën e parë të replikave përfundimtare të prokurorisë, avokati i përgjithshëm Rodolphe Juy-Birmann deklaroi se kjo çështje “ndodhet në nivelin më të lartë të rëndesës që mund të njohë Republika Franceze”, duke argumentuar kërkesën për dënim ndaj ish-kreut të shtetit.
Sipas prokurorisë, Sarkozy ka pasur një rol aktiv në një marrëveshje të dyshuar që synonte financimin e fushatës së tij presidenciale, duke u mbështetur në prova direkte dhe indirekte, si dhe në analiza logjike të hetimit.
“Një garë elektorale nuk justifikon asnjë komprometim”, u shpreh prokuroria, duke theksuar se dosja nuk mbështetet në teori konspirative, por në elemente konkrete hetimore.
Prokurori Damien Brunet e përqendroi argumentimin e tij te akuza për “shoqatë keqbërësish”, të cilën e cilësoi si “mekanizmin kryesor të projektit kriminal”, me qëllimin përfundimtar financimin e fushatës së Sarkozy në vitin 2007.
Në shkallën e parë, ish-presidenti francez ishte dënuar me pesë vite burgim të pakushtëzuar, ndërsa procesi i apelit pritet të vijojë për disa ditë, me debat të thelluar mbi rolin e tij në këtë çështje.
