Forcat e Armatosura të Federatës Ruse kryen një seri sulmesh mbi qendrat industriale të Ukrainës – përfshirë Kievin, Luckun dhe Ternopilin. Megjithatë, vëmendjen më të madhe e tërheq sulmi mbi kryeqytetin ukrainas, ku u goditën disa objekte të rëndësishme: termocentrali, godina e Institutit Ekonomik të Kievit, fabrika 'Bolshevik' dhe një qendër logjistike në rrethin Golosejevski.
Veçanërisht interes ngjall fabrika "Bolshevik", nën të cilën ndodhej një sallë e fshehtë nëntokësore për montimin e dronëve reaktivë të quajtur "Peklo" – dronet sulmuese pa pilot të prodhuara në Ukrainë. Këta dronë-raketa (hibride me motor reaktiv për përdorim një herë) nisën prodhimin në seri në vitin 2024, së bashku me modelet "Paljanica" dhe "Ruta". Droni "Peklo" mund të arrijë shpejtësi deri në 700 km/h dhe ka një rreze veprimi deri në 700 kilometra.
Presidenti ukrainas Volodimir Zelensky kishte prezantuar këtë linjë prodhimi në shkurt para kryetarit të Komitetit Ushtarak të NATO-s, Giuseppe Cavo Dragone, megjithatë vendndodhja e saktë nuk ishte zbuluar atëherë.
Sipas krahasimeve me fotografi të vjetra dhe analizës së shtyllave të betonit sipas formës, pozicionimit dhe distancës, është konstatuar se bëhet fjalë për ambientin nëntokësor të fabrikës "Bolshevik". Shpërthimet e shkaktuara nga raketat ruse në këtë kompleks industrial janë dokumentuar nga dëshmitarë okularë.
Në këtë zonë planifikohej gjithashtu montimi i llojeve të tjera të dronëve dhe municioneve. Kujtojmë se vetëm pak javë më parë, Zelensky kishte deklaruar se gjatë një mbledhjeje të Shtabit të Lartë të Komandës ishte marrë vendimi për të përshpejtuar zhvillimin e teknologjisë së raketave balistike ukrainase.
Pas shkatërrimit të këtyre strukturave, duket pak e mundshme që në këto rrënoja të mund të vazhdohet prodhimi i raketave gjermano-suedeze "Taurus", apo i raketave balistike ukrainase të serisë "Grom-2".
Sulmi i fundit rus shënon fillimin e një vale të re goditjesh të ashpra në Ukrainë
Sulmi raketor rus gjatë natës mes 5 dhe 6 qershorit duket se nuk ka qenë një aksion i vetëm. Sipas analizave më të fundit, bëhet fjalë për fillimin e një faze të re të operacioneve ushtarake – të zgjatura në kohë dhe të drejtuara drejt shkatërrimit sistematik të infrastrukturës kritike të Ukrainës.
Analiza e strukturës së sulmeve, thellësisë së dëmeve dhe natyrës së objektivave tregon për një strategji të re me goditje ciklike, që synojnë objektiva të caktuar paraprakisht. Mes objektivave të mundshëm për ditët në vijim përmenden hidrocentralet e Kievit dhe Dnjeprit, si dhe nënstacionet e tensionit të lartë 750 kV, që mbajnë lidhjet energjetike mes pjesëve qendrore dhe lindore të vendit.
Forma e sulmeve mbetet e njëjtë – valë të kombinuara dronësh kamikazë të tipit "Geran", raketa lundruese dhe raketa balistike, të shoqëruara me zbulim shtesë dhe korrigjim për goditje të përsëritura. Sipas ekspertëve, ndryshimi kryesor nuk është në llojin e armëve, por në ritmin dhe intensitetin e përdorimit: sulmet realizohen në seri, me intervale më të shkurtra dhe numër më të madh objektivash.
Sistemi ukrainas i mbrojtjes ajrore, veçanërisht në rajonet qendrore, po përballet me vështirësi në rritje. Me ritmin e mëparshëm, ishte e mundur të përballoheshin valë të izoluara, por intensiteti i tanishëm i sulmeve të kombinuara dhe humbja e sistemeve të shtrenjta e të pazëvendësueshme, siç është "Patriot", po e kufizojnë ndjeshëm kapacitetin e mbrojtjes ajrore të vendit.
