Sulmi rus që dëmtoi selinë e qeverisë ukrainase në Kiev, i cili është hera e parë në tre vjet e gjysmë lufte, u krye me një raketë balistike Iskander, njoftoi "krahu i djathtë" i presidentit ukrainas, kreu i zyrës së tij, Andriy Yermak.
"Për herë të parë, armiku sulmoi ndërtesën e qeverisë ukrainase, një sulm me një raketë balistike Iskander", shkroi ai në një postim në platformën X.
Yermak tha se e diskutoi sulmin në një telefonatë me Sekretarin e Shtetit të SHBA-së, Marco Rubio.
Rusia përdor shpesh raketa Iskander kundër Ukrainës. Të dielën, ajo nisi valën më të madhe të dronëve dhe raketave deri më sot në Kiev dhe zona të tjera.
Ambasadorja e BE-së në Ukrainë, Katarina Materna, tha më parë se kishte shkuar në selinë e qeverisë dhe kishte parë "vrimën e gjerë" të lënë nga raketa, si dhe mbeturinat e saj. Ajo vuri në dukje se ndërtesa nuk ishte shkatërruar plotësisht sepse "raketa nuk shpërtheu plotësisht".
Andriy Danyk, kreu i Shërbimit të Situatave të Emergjencës të Ukrainës, tha se dëmi mbulon një sipërfaqe prej 800-900 metrash katrorë. Zjarri i shkaktuar nga sulmi u përhap "shumë shpejt", u tha ai gazetarëve që vizituan ndërtesën për të parë dëmet.
