Presidenti i Venezuelës, Nicolás Maduro, deklaroi të mërkurën se e ardhmja e Amerikës “nuk mund të jetë luftë apo kërcënim ushtarak” dhe përsëriti gatishmërinë e tij për dialog me Presidentin e SHBA-së, Donald Trump.
Fjalimi u mbajt gjatë një takimi me anëtarët e Brigadës Ndërkombëtare Kubë-Venezuelë dhe u transmetua në televizionin shtetëror. Maduro hodhi poshtë çdo sugjerim për një rikthim në kolonializëm dhe denoncoi presionin ushtarak amerikan në Karaibe, të cilin Karakasi e sheh si një përpjekje për të ndryshuar regjimin. “Koha e kolonializmit, skllavërisë dhe servilizmit ndaj fuqive imperiale ka mbaruar prej kohësh. Nuk u kemi borxh asgjë” -tha Maduro. Ai akuzoi gjithashtu sektorët e pushtetit në SHBA për krijimin e një “realiteti virtual” që justifikon plaçkitjen e burimeve të Venezuelës.
Sipas udhëheqësit çavist, po zhvillohet një “luftë psikologjike” kundër vendit, që synon të prishë paqen e brendshme, duke përfshirë edhe pretendimet për “të drejta nafte” nga kompanitë amerikane. Maduro e quajti gjithashtu sekuestrimin e dy anijeve të ngarkuara me naftë bruto si akt “piraterie”. Deklaratat vijnë në një kohë tensionesh të larta mes Karakasit dhe Uashingtonit për praninë ushtarake amerikane në rajon dhe për kontrollin mbi burimet energjetike të Venezuelës. Versus.al
