Pas 16 vitesh në pushtet, epoka e Viktor Orban mund të konsiderohet e mbyllur në Hungari. Ai mbajti një fjalim të shkurtër pas humbjes së zgjedhjeve duke e pranuar humbjen.
“Rezultati i zgjedhjeve është i dhimbshëm për ne, por i qartë”- u shpreh ai.
Orban përgëzoi partinë fituese të opozitës, ‘Tisza’ të Péter Magyar, ndërsa shprehu se partia e tij nuk ka punuar kurrë kaq shumë në asnjë fushatë zgjedhore dhe falënderoi 2,5 milionë hungarezët që votuan për partinë e tij..
“Ne do t’i shërbejmë vendit tonë dhe kombit hungarez nga opozita”, tha ai.
Mirëpo gjatë 16 viteve të drejtimit të Orban, Hungaria u përfshi nga një sërë skandalesh të cilat edhe e dobësuan imazhin e vendit në arenën ndërkombëtare.
Mes rasteve më të bujshme ishte dorëheqja e presidentes së vendit pas një rasti pedofilie që u bë publik në vitin 2024. Ky skandal shkaktoi protesta masive në Budapest dhe u cilësua nga opozita si kriza më e madhe politike e epokës Orbán, duke nxjerrë në pah dobësitë e institucioneve dhe mungesën e transparencës në pushtet.
Tjetër element i rëndësishëm ka qenë pasurimi i elitave të afërta me kryeministrin. Familja e Orban dhe miqtë e tij të ngushtë, si Lorinc Meszaros, kanë përfituar kontrata publike dhe fonde të Bashkimit Europian, duke u bërë ndër më të pasurit në vend.
Media raportuan prona luksoze dhe shfaqje të hapura të luksit, si rezidenca e babait të Orban me zebra në oborr, që u kthye në simbol të korrupsionit dhe abuzimit me pushtetin. Këto raste kanë sjellë kritika të ashpra nga BE, e cila ka akuzuar Hungarinë për keqpërdorim të fondeve europiane.
Një skandal i veçantë që ekspozoi hipokrizinë e partisë Fidesz ishte ai i eurodeputetit Jozsef Szajer në vitin 2020. Ai u kap në Bruksel duke marrë pjesë në një festë seksi “gay”, në kundërshtim me ligjet e izolimit gjatë pandemisë, ndërsa policia gjeti drogë në çantën e tij.
Szajer, një nga themeluesit e Fidesz dhe arkitekt i kushtetutës konservatore të Hungarisë, u përpoq të largohej duke zbritur në një tub kullues. Dorëheqja e tij dhe falja publike për “një dështim personal” u panë si dëshmi e hipokrizisë së partisë që ndërtonte reputacionin mbi retorikën anti-LGBT dhe vlerat tradicionale.
Gjithashtu përveç këtyre skandaleve individuale, Bashkimi Europian ka kritikuar vazhdimisht Orbanin për dobësimin e demokracisë dhe kontrollin e institucioneve duke u fshehur nën petkun e konservatorizmit. Sipas raporteve të mëhershme të BE, mediat, gjyqësori dhe administrata publike ishin totalisht nën ndikimin e pushtetit duke e kthyer Hungarinë në shtet me “autokraci elektorale”.
Zgjedhjet e vitit 2026 u cilësuan si më të rëndësishmet që nga rënia e komunizmit, me opozitën që për herë të parë kishte shanse reale për të sfiduar pushtetin e tij, duke e bërë të pasigurt të ardhmen politike të Orbán.
Rezultati i djeshëm shënon një kthesë të madhe për Hungarinë, duke mbyllur një kapitull të gjatë nën sundimin e Viktor Orban dhe duke hapur një epokë të re nën drejtimin e Peter Magyar. Për shumë qytetarë, kjo fitore është jo vetëm një ndryshim politik, por edhe një shpresë për një Hungari më demokratike dhe më të besueshme në arenën ndërkombëtare. Versus.al
