Kryeministri i Suedisë, Ulf Kristersson, ka deklaruar se vendet evropiane anëtare të NATO-s duhet të përgatiten për një ndarje të qëndrueshme me Rusinë, duke i nxitur ato të forcojnë mbështetjen për Kievin në luftën kundër agresionit rus.
“Unë besoj fuqimisht se Suedia, Estonia dhe Bashkimi Evropian duhet të përgatiten për një izolim afatgjatë të Rusisë,” tha Kristersson pas takimit me kryeministren estoneze Kristen Michal në Talin.
Izolim ekonomik dhe forcim ushtarak
Që nga përshkallëzimi i konfliktit në Ukrainë në shkurt të vitit 2022, vendet perëndimore kanë vendosur disa raunde sanksionesh ndaj Moskës në përpjekje për ta izoluar ekonomikisht.
Së fundmi, Evropa ka nisur edhe një fazë të re të forcimit ushtarak, me qeveritë që po rrisin ndjeshëm buxhetet e mbrojtjes si përgjigje ndaj kërcënimit rus.
Kristersson vlerësoi Estoninë për vendimin e saj që ta rrisë buxhetin e mbrojtjes mbi 5% të PBB-së, duke shtuar se edhe Stokholmi po ndjek të njëjtën rrugë.
Sipas tij, një qëndrim i unifikuar dhe i qëndrueshëm është thelbësor për të ruajtur sigurinë në Evropën Lindore.
Reagimi i Moskës
Nga ana tjetër, zëdhënësi i Kremlinit, Dmitry Peskov, ka deklaruar më herët këtë vit se Rusia është “shumë e madhe për t’u izoluar”, duke paralajmëruar se sanksionet janë një “shpatë me dy tehe” që dëmton edhe vendet që i zbatojnë ato.
Mbështetje për krahun lindor të NATO-s
Kristersson theksoi se Suedia nuk është naive ndaj qëllimeve të Rusisë dhe është e gatshme të kontribuojë në forcimin e mbrojtjes së krahut lindor të NATO-s, përfshirë vendosjen e kapaciteteve ajrore dhe raketore.
“Ne duhet të jemi të bashkuar, të përgatitur dhe të vendosur përballë çdo kërcënimi,” përfundoi kryeministri suedez.
