Rusia dhe Ukraina kanë shkëmbyer sulme të ashpra me dronë dhe raketa, ndërsa luftime intensive vazhdojnë përgjatë vijës së frontit. Zyrtarë nga të dyja palët konfirmuan përdorimin e mjeteve ajrore pa pilot, në një përshkallëzim të ndjeshëm të konfliktit.
Presidenti ukrainas Volodymyr Zelensky tha se sulmet e natës nga Rusia ishin një “përgjigje” ndaj propozimit të Kievit për një armëpushim të menjëhershëm, të bërë gjatë takimit me delegacionin rus në Stamboll një ditë më parë.
Sipas Zelensky-t, gjatë sulmeve Rusia përdori mbi 100 dronë, kryesisht të tipit iranian Shahed, dhe katër raketa. “Rusia vazhdon terrorin dhe pengon diplomacinë. Duhet të përballet me sanksione të plota dhe përgjigje ushtarake ndaj bazave dhe logjistikës së saj,” shkroi ai në Telegram.
Zyrtarët lokalë thanë se të paktën tre persona u vranë dhe dhjetëra të tjerë u plagosën. Në Harkiv, sulmet me raketa lanë të plagosur gjashtë fëmijë, përfshirë një vajzë njëvjeçare. U dëmtuan ndërtesa banimi, automjete civile dhe objekte publike.
Një banore nga Harkivi tregoi për Radion Evropa e Lirë: “Kur hyra në apartament pas sulmit, gjithçka ishte e shkatërruar.”. /Versus.al
